Áskerı áleýet – álem elderi úshin mańyzdy ólshem. Tynyshtyq pen tutastyqtyń qalqany – qarýly kúshter. Shekara shebin shegendep, áýe – teńiz torabyn taban aýdarmaı torýyldap, qorǵaý – beıbitshilik besigi shaıqalyp turǵan jahan jaǵdaıynda salmaqty mindet.
Uly dala batyrlarynyń enshisine buıyrǵan erlik is pen Otanǵa qorǵan bolý erkin qazaq erleri eńserip keledi. Bıyl Qarýly kúshterdiń qurylǵanyna – 31 jyl. Úsh on jyldyqtan asa ýaqytta Qazaqstan qarýly kúshteri materıaldyq-bazalyq, áskerı-áleýmettik, qurylymdyq ári ıdeologııalyq turǵyda nyq adymdar jasady. Bıyl Global Firepower álemdik áskerı kúshti anyqtaıtyn reıtıngte el áskeri 138 eldiń ishinde 63 orynǵa turaqtady. Bul tizimdi sarapshylar 60 túrli faktordy, onyń ishinde, memlekettiń qorǵanysqa jumsalatyn shyǵyndar deńgeıin, tehnıkalar jáne jabdyqtar arsenalyn, armııa sanyn, tankter, korablder men ushaqtar sanyn, armııanyń jaýyngerlik qabilettiligine áser etetin resýrstardy baǵalady.
Qazaqstan qarýly kúshteri áskerı qyzmetke telingen steorotıpterdi syndyryp, shynaıy Otan qorǵaýǵa beıildi azamattardyń artýyna den qoıyp jatyr. Osy qatardaǵy qoǵamnan qoldaý tapqan oń ózgeris merzimdi qyzmetti óteýge shaqyrtý naýryz-maýsym, qyrkúıek-jeltoqsan aılarynda eki ret júzege asyrylady. Mindetin óteýshi sarbazdar qyzmeti tolyq aıaqtalǵan soń, kelesi lek paryzyn oryndaýǵa shaqyrylady. Bul sheshim áskerdegi álimjettik týraly keleńsiz oılardyń taralýyn tusaýlaıdy. Sondaı-aq jigitterdiń otan aldyndaǵy boryshyn óteýge degen yntasyn arttyrý maqsatynda olardyń bank aldyndaǵy bereshegin ýaqytsha toqtatý, temirdeı tártip, úlgili mindet atqarýshyǵa JOO-ǵa grant usyný qaǵıdalary da qatardaǵy sarbazdardyń sapyn qalyńdatýǵa sep bolyp otyr.
Biz memleket mejelegen osy mıssııalardyń oryndalý barysyn QR Qorǵanys mınıstrligi 68 665 erekshe maqsattaǵy áskerı bólimge baryp baıqap qaıttyq.
68 665 erekshe maqsattaǵy áskerı bólimniń negizgi mindetteriniń biri – Astana qalasyndaǵy qoǵamdyq tártipti saqtaý.
Erekshe maqsattaǵy brıgadanyń qurylý tarıhyn bólimshe komandıriniń tárbıe jáne ıdeologııalyq jumys jónindegi orynbasary, podpolkovnık Talǵat Qulmanov baıandap berdi.
«Erekshe maqsattaǵy brıgada 2003 jyly jeke desanttyq shabýyldaýshy batalon bolyp quryldy. Elordanyń ákimshilik-aýmaqtyq ulǵaıýyna, qarýly kúshterdegi shtattyq ózgeristerge sáıkes brıgada keıinnen desanttyq shabýyldaýshy brıgada bolyp quryldy. 2023 jyly desanttyq shabýyldaýshy áskerleriniń qurlyq áskerleri quramynan shyǵýyna baılanysty áskerı bólim erekshe maqsattaǵy brıgada bolyp qaıta ataýyn ózgertti», dedi Talǵat Qulmanov.
68 665 erekshe maqsattaǵy áskerı bólim quramynda - mınomettik batareıa, barlaý rotasy, áýe-qorǵanys batareıasy, qurmet qaraýyl rotasy bar.
«Arnasaı» shabýyldaýshy batalony 2 apta buryn jas sarbazdarmen tolyǵypty. Olar áskerı mindetin oryndaýǵa Astana qalasynan bólek 3 oblystan shaqyrylǵan. Jas sarbazdardy áskerı ómirge beıimdeý prosesi qarqyndy júrgizilip jatyr.
Biz áskerı bólimge barǵan kúni jas sarbazdar qoldaryndaǵy qarýlaryn alǵash ret qoldanyp, qarýdan nysanany kózdeý boıynsha atý oqý-jattyǵýyn ótkizdi.
Qatardaǵy jaýynger Birjan Quttybaı alǵashqy jattyǵýda-aq dáldigimen kózge tústi.
«Qolymdaǵy qarý AKS -74-ten búgin birinshi ret atý jattyǵýyn jasadym. Atý barysynda bizge 9 oq berildi, onyń tórteýin dóp tıgizdim. Boıymda eshqandaı qorqynysh bolmady, eldiń tiregi bolatyn er azamattardyń osy sezimdi jeńýi mańyzdy dep oılaımyn», dedi jas sarbaz.
68 665 erekshe maqsattaǵy áskerı bólim kazarmasyna kelgende Talǵat Joldybaıuly sarbazdardyń kún tártibin tanystyrdy. Podpolgovnıktiń aıtýynsha, áskerge jańa kelgen jigitterdi ózgeriske beıimdeý isine mán berý mańyzdy.
«Jas sarbazdardy áskerı ómirge tez úıretý maqsatynda 1 aı kóleminde jıyn ótkiziledi. Jıynnyń bastyǵy bolyp ózim taǵaıyndaldym, brıgada komandıriniń orynbasary. Batalon komandıri bir satyǵa tómendetilip rota komandıri boldy, rota komandırleri de osy úrdispen vzvod komandırleri boldy. Bul jas sarbazdarmen tyǵyz qarym-qatynasta bola otyryp áskerge tezirek qalyptasýyna yqpal etedi», dedi Talǵat Qulmanov.
68 665 erekshe maqsattaǵy áskerı bólim qataryna óz erkimen kelgen sarbaz Eldar Súıinbaı da bar. Ol áskerge kelip osy baǵytta aıtylyp júrgen syn-pikirler is-júzinde qarama-qaıshylyq týdyratynyn aıtty.
«Áskerden alǵan áserim bastapqy oılaǵanymdaı emes. Qoǵamda qalyptasqan steorotıpterge sene berýge bolmaıtyna kózim jetti. Erekshe maqsattaǵy brıgada áskerı daıyndyq jumysyn naqty túsindirip jatyr. Meni qatarlastarymnyń barlyǵy óz erkimen kelgeni tańdandyrmaı qoımady. Qazir áskerı ant qabyldaýǵa daıyndyq jumystary júrgizilip jatyr. Arnaýly demalys ýaqyttary bar. Bul kezde biz, jas sarbazdar ústel ústinde oınaıtyn ıntellektýaldyq oıyndarmen shuǵyldanyp, tipti, án salamyz, gazet te oqımyz, sporttyq telebaǵdarlama da kóremiz», dedi Eldar Súıinbaı.
Eldar áskerge deıin Astana qalalyq qýyrshaq teatrynda ártis bolyp qyzmet atqarǵan. О́nerli jigitter qalypty ómirdegi kúnderin eske alyp, mereke qarsańynda án-sálem joldady.
68 665 erekshe maqsattaǵy áskerı bólim sarbazdaryna aptanyń senbi-jeksenbi kúnderi arnaıy planshetpen ata-analarymen beınebaılanys ornatýǵa ruqsat etilgen.