Alaıaqtar zeınetkerdi tórt mıllıon teńgeden astam somaǵa aldap ketken, dep habarlaıdy Egemen.kz Pavlodar oblysynyń Polısııa departamentine silteme jasap.
Belgisiz bireýler pavlodarlyq qartqa telefon soǵyp, ózderin bank qyzmetkerleri retinde tanystyrǵan. Alaıaqtar zeınetkerge bireýdiń onyń atynan nesıe alǵysy kelgenin aıtqan. О́tinishten bas tartý úshin taǵy eki bankten nesıe alý qajet. Zeınetker alaıaqqa senip, aıtqanyn oryndaǵan. Nátıjesinde er adam eki bankten ózine jalpy somasy 4 201 198 teńge nesıe alyp, telefon soǵýshylardyń kórsetken esepshotyna aýdarǵan.
Polıseıler buǵan deıin jasalyp jatqan eskertýlerge qaramastan, azamattar belgisiz qońyraý shalýshylarǵa senýin jalǵastyryp jatqanyn atap ótti. Kóbinese qart adamdar alaıaqtardyń qurbany bolady.
«Alaıaqtyq faktisi boıynsha sotqa deıingi tergeý bastaldy. Kúdiktiniń jeke basyn anyqtaý boıynsha jedel-izdestirý sharalary júrgizilip jatyr», dep habarlady oblystyq Polısııa departamentiniń baspasóz qyzmeti.
Tártip saqshylary beıtanys jáne belgisiz tulǵalarǵa senbeýdi suraıdy.