Azamattyq nekedegi áıeli Saltanat Núkenovany asa qatigezdikpen óltirdi degen kúdikke ilingen eks-mınıstr Qýandyq Bıshimbaevtyń jáne asa aýyr qylmysty jasyrdy dep aıyptalǵan Baqytjan Baıjanovtyń aıyptary tolyq dáleldenip, osy iske qatysty sot úkimi shyqty, dep habarlaıdy Egemen.kz.
Búgin qoǵamdyq rezonans týdyrǵan atalǵan istiń núktesi qoıyldy. Astana qalasynyń qylmystyq ister jónindegi mamandandyrylǵan aýdanaralyq sotynda Bıshimbaev pen Baıjanovqa qatysty qylmystyq is boıynsha úkim jarııalandy.
Eske salaıyq, Qýandyq Bıshimbaevqa Qylmystyq kodekstiń 99-baby jáne 110-baby boıynsha aıyp taǵylǵan. Al Baqytjan Baıjanov Qylmystyq kodekstiń 432-baby boıynsha aıyptalyp otyr.
Sot úkimine sáıkes, eks-mınıstr Qýandyq Bıshimbaev Qylmystyq kodekstiń 110-baby 2-bóligi 1-tarmaǵy (qınaý) boıynsha kináli dep tanyldy. Bul bap boıynsha aıyptalýshy 7 jylǵa bas bostandyǵynan aıyryldy.
Ol sondaı-aq Qylmystyq kodekstiń 99-baby 2-bóligi 5-tarmaǵy (asa qatygezdikpen adam óltirý) boıynsha kináli dep tanyldy. Bul bap boıynsha 20 jylǵa bas bostandyǵynan aıyryldy. Jazany jeńildetetin mán-jaılardyń, dálirek aıtqanda kámelet jasyna tolmaǵan balalarynyń bolýyna baılanysty Bıshimbaev túpkilikti 24 jylǵa bas bostandyǵynan aıyryldy.
Al Baqytjan Baıjanov Qýandyq Bıshimbaev jasaǵan asa aýyr qylmysty ýádesiz jasyrý boıynsha kináli dep tanylyp, Qylmystyq kodekstiń 432-baby boıynsha 4 jylǵa sottaldy. Aıyptaý qorytyndysyna sáıkes, Baıjanovtyń qylmystyq jaýapkershiligi men jazasyn aýyrlatatyn mán-jaılar anyqtalmaǵan.
Aıta keteıik, qylmystyq is alqabılerdiń qatysýymen qaraldy.
Sottalýshylardyń kinási jábirlenýshiniń, kýálardyń aıǵaqtarymen, aýdıo-beınematerıaldarmen, saraptamalyq qorytyndylarmen jáne qylmystyq istiń basqa materıaldarymen dáleldendi.
Buǵan deıin, prokýror Bıshimbaevty 24 jylǵa, Baıjanovty 4 jylǵa bas bostandyǵynan aıyrýdy suraǵan edi. Al sottalýshylar óz kinálaryn moıyndamady.
Sot Qylmystyq kodekstiń 14-babynyń 2-bóliginiń 2-tarmaǵynyń negizinde Bıshimbaevtyń qylmystyq jaýaptylyǵy men jazasyn aýyrlatatyn mán-jaı retinde qylmystardyń qaýipti qaıtalanýyn, sondaı-aq mas kúıinde qylmystyq quqyq buzýshylyqty jasaýyn tanydy.