«Múgedekter masyl bolmaıdy»

– deıdi «Úmit-Nadejda» qoǵamdyq birlestiginiń tóraǵasy Dúısenǵalı Ospanov

Qostanaı qalasynyń shet shaǵyn aýdanyndaǵy ǵımarattyń tómengi qabatynyń bir jaǵyn túgeldeı alyp, sonda «Úmit-Nadejda» qoǵamdyq birlestigi ıgilikti ister atqaryp otyr. Bul múgedek jandardyń izdep kelip, jan shýaǵyn seziner, kóńiline rýhanı medet tabar orny. Jaqynda osy qoǵamdyq birlestiktiń tóraǵasy Dúısenǵalı Ospanov pen qolóner sheberi Alına Lamparter «Nur Otan» partııasynyń qoldaýymen 7-shi ret berilgen «JanShýaq» qoǵamdyq syılyǵyna ıe boldy. Bizdiń tilshimiz «Úmit-Nadejda» qoǵamdyq birlestiginde bolyp, Dúısenǵalı OSPANOVPEN áńgimelesken edi. – Dúısenǵalı, syılyǵyńyz qutty bolsyn! – Rahmet. Eńbegimizdi satpaımyz, tek mundaı marapat arqyly múmkindigi shekteýli jandardyń da masyl emes, qoǵamǵa paıdaly is tyndyra alatynyn jurt bilse boldy. – Syılyqtyń atalymy «Múge­dek jandardyń ómir sapasyn jaq­sartqany úshin» dep atalady. Osy atalym, rasynda, siz bas­qara­tyn «Úmit-Nadejda» qoǵamdyq birlestiginiń atqarǵan isterine dál kelip turǵan joq pa?! – Aıtqanyńyz oryndy. Jubaıym Arýna Jaqsyǵulova ekeýmiz osydan on jyl buryn «Úmit-Nadejda» qoǵamdyq birlestigin qurǵan bolatynbyz. Atqarǵan isimizdiń barlyǵy da qostanaılyqtardyń kóz aldynda. О́zimiz túrli jobalar jasap, sol arqyly túrli qorlardyń bólgen qarjysyn utyp alyp, jumys istep kelemiz. Sońǵy ret bizdiń jobalarymyz «Soros-Qazaqstan», Tuńǵysh Prezıdent qorlarynyń granttaryn utyp aldy. Alǵashqy kezden bastap, Qostanaı qalasyndaǵy, odan qaldy, aýdandardaǵy arbada otyryp qalǵan jandarǵa mú­gedekter arbasyn jetkizip berip júrdik. Buryn Keńes Odaǵy kezinde múgedekterge yńǵaılanyp jasalǵan jeńil mashınalar bolatyn. Keıingi kezde sondaı mashınalar jasalmaıdy. Biz osy máseleni kóterip, birneshe ret avtosherý ótkizdik. Aldymen Qazaqstandy aralap shyqtyq. 2013 jyly avtosherýmen Qazaqstan men Reseıdi araladyq. Biraq áli de bul másele sheshimin tapqan joq. Úsh jyldan beri «Úmit-Nadejda» qoǵamdyq birlestigi ǵımarattyń tómengi qabatyn jalǵa alyp, onda múgedek jandar úshin kóptegen jumystar júrgizemiz. Qazir ortalyqqa otyzshaqty adam keledi. Olar keshke deıin osynda ózderiniń súıikti isimen aınalysady. Kúnine bir mezgil ystyq tamaq beremiz. Ortalyqta birneshe kabınet bar. Internetke qosylǵan kompıýter klasy, sport-jattyǵý zaly, medısına kabıneti, mýzyka kabıneti, qolóner zaly jumys isteıdi. Baǵasy bir mıllıon teńgedeı turatyn mýzykalyq apparat-jabdyq satyp alǵanbyz. Eki tigin mashınasy taǵy bar. Arbada otyrǵan kisilerdiń kópshiligi massajdy qajet etedi. Sondyqtan onyń jabdyǵy da osydan tabylady. «Úmit-Nadejda» qoǵamdyq birlestiginiń ansambli jumys isteı bastady. Ol qoǵamdyq oryndarda, «Sosnovyı bor» sanatorııiniń demalýshylary aldynda jıi konsert beredi. Kásibı mýzykalyq bilimi bar, belgili ánshi Kúnsulý Jaqaeva bizdiń birlestiktegi án aıtatyn kisilerdiń daýysyn qoıady, ánder úıretedi, jalpy, osy ansamblge jetekshilik etedi. Jurtshylyq aldynda batyl konsert bere bastaǵanymyz da osy kásibı daıyndyqtyń arqasy. Aramyzda ónerli jandar jetkilikti. – Bul ortalyqta tek kásibı mýzyka mamany ǵana emes, psıholog, medısına qyzmetkeri, kásibı sport mamany qyzmet isteıtininen habardarmyz. Bul sizderdegi jumys deńgeıiniń bıiktigin kórsetetini ras. Taratyp aıtyp ketseńiz. – Mundaı qoǵamdyq birlestikterde kásibı mamandardyń qyzmet isteýi jıi kezdese bermeıdi. Biz ótken jyldary segiz kompıýter alyp, onda múgedekterdi oqyttyq. Olarmen maman muǵalim jumys istedi. Kompıýterdi meńgergenderge sertıfıkat berdik. Bizdiń birlestikte «Preodolenıe» degen ortalyq jumys isteıdi. Onda is qaǵazdaryn júrgizýdi, polıgrafııalyq dızaındy, foto isin oqytyp jatyrmyz. Demek, bizdiń sertıfıkatty alǵan soń, múmkindigi shekteýli jandar jumys izdeýge talpynady. Jaqynda olardyń alǵashqy toby bitirdi, qala ortalyǵyndaǵy mádenıet saraıynda konsert qoıyp, olarǵa sertıfıkattaryn tapsyrdyq. Bizdiń sport-jattyǵý zalynda múgedekter arbada bıleýmen, jeńil atletıkamen jáne ústel tennısimen aınalysady. «Úmit-Nadejda» birlestiginiń taǵy bir maqtanarlyq isi bar. Mysaly, bıyl Inchhonda ótken paralımpııalyq Azııa oıyndaryna Qazaqstannan 86 sportshy qatysqany belgili. So­lardyń arasynda arbada bıleýden qazaqstandyq sportshylar bir kúmis, bir qola medal alyp qaıtty. Men maqtanyp-aq aıtaıyn, arbada otyryp bıleý sportymen alǵash qostanaılyq múgedek jandar aınalysa bastaǵan edi. Onyń negizin elimizde «Úmit-Nadejda» birlestigi qalady. Osy bedeldi jarysqa Qostanaıdan úsh paralımpııalyq sportshy jeńil atletıka men myltyq atýdan baryp keldi. Respýblıkadaǵy Ulttyq paralımpııalyq komıtettiń bizdiń oblysta fılıalyn ashyp, ony basqarýdy maǵan júktedi. Biz múmkindigi shekteýli jandar arasynda talantty sportshylardy taýyp, olardy daıyndaý jumystaryn bastap kettik. Biraq múgedekter úshin mamandandyrylǵan, arnaıy jabdyqtalǵan sport zaly joq. Respýblıkada osy másele eskerilmegen úsh oblys bolsa, sonyń biri – Qostanaı. Jaqynda oblys ákimi Nuraly Sádýaqasov múmkindigi shekteýli jandardyń talap-tilekterin tyńdaǵan bolatyn. Sonda biz Qostanaıda sport klýbyn, arnaıy sport zalyn ashý týraly tilegimizdi aıttyq. Taǵdyrdyń talaıynda qalǵan jandar úshin sport aldymen densaýlyq, ekinshiden olardyń ómirge degen qulshynysyn oıatady. – Qostanaıdaǵy múmkindigi shek­teýli jandar úshin ózekti másele tek sport zal bolsa, onyń jarasy jeńil bolar?.. – Osy suraǵyńyz meniń esime keremet bir máseleni salyp otyr. Ol bizdiń qoǵamdaǵy múgedekterge degen kózqarastyń ózgerýi der edim. Buryn onsyz da taǵdyrdyń aýyrtpalyǵyn kóterip júrgen múgedek jandar kóshege shyǵa almaıtyn. Olarǵa adamdar tiksine nemese músirkeı qaraıtyn. Múgedek jandar da osyndaı suq kózderden jasqanyp, ózderin qoǵamnyń tolyqqandy múshesi sezine almas edi. Qazir olaı emes. Qostanaıda osydan biraz jyl buryn múgedek jastar úkimettik emes uıymdardyń qozǵaýymen tegin joǵary bilim ala bastady. Olardy jumysqa ornalastyrý úshin bos oryn jármeńkeleri ótip turady. «Kedergisiz keleshek» jobasy aıasynda qoǵamdyq oryndarǵa pandýstar jasalýda, onyń sapasyna «Nur Otan» partııasynyń oblystyq fılıaly da yqpal etip otyrady. Barlyq jerde osyndaı jumystar júrip jatyr. Múmkindigi shekteýli jandar jumys istep, jurt qatarly óziniń nápaqasyn taýyp, odan qaldy, óziniń qolynan kelgen isimen qoǵamǵa paıda keltirýge umtylady. Ondaı jan ózin masyl sezinbeıdi. Múgedekterge qoǵamda mundaı jyly kózqarastyń qalyptasýyna olardyń ózderiniń talpynýy da kómek boldy. Mysaly, bizdiń «Úmit-Nadejda» birlestigi on jyldan beri qandaı shara ótkizbedi deseńshi. Ortalyqqa kelgen múgedek jastar alǵashqyda bir-birine tosyrqaı qaraıtyn. Qazir olar aralasyp-quralasyp ketti. Men olarǵa «Men de sender sekildi jas kezimde ómirden jeńilmeý úshin alǵa talpyna berdim. Adamdarmen aralastym, Arýna ekeýmiz tabysyp, otaý qurdyq. Solaı bir birińmen tanysyńdar, tabysyńdar, ómirden qalmańdar. Sonda ǵana aınalańdaǵylar senderge teń kózqaraspen qaraıdy», dep aqylymdy aıtyp otyramyn. Endi ózekti máselege keleıin. Bizder utyp alǵan granttarda múgedekterdiń qoǵamdyq uıymdaryna arnalǵan bas­pana máselesi qamtylmaıdy. Biz 170 sharshy metr bolatyn bólmelerdi jalǵa alamyz, aıyna 85 myń teńge tóleımiz, qaltamyzdan qarjy shyǵaratyn kezi­miz az bolmaıdy. Bul bizge óte aýyr tıedi. Kóship-qona berýge shama kelmeıdi. Tek biz ǵana emes, qalada múgedekterdiń basqa da úkimettik emes uıymdary bar. Barlyǵyna ortaq qıyndyq bul. Osy máseleni kópten kóterip kelemiz, biraq sheshimin tapqan emes. Múgedek jandardyń qoǵamdyq uıymdary tabys tabatyn kásiporyn emes, sondyqtan jergilikti bıýdjetten ortaq qarjylandyrylsa, ol ǵımaratty jalǵa alý aqysyna jumsalsa degen tilek bar. Qamqorlyq bolyp, qoltyqtan demep jiberse, múmkindigi shekteýli jandardyń ishki rýhynyń myqtylyǵymen talaı shepti alyp júrgenine jurt kýá. – Áńgimeńizge rahmet. Áńgimelesken Názıra JÁRIMBETOVA, «Egemen Qazaqstan». QOSTANAI.