Elordadaǵy «Jastar» teatrynda «SENSITIVE» óner ujymy Aleksandr Grınniń áıgili «Alye parýsa» povesiniń jelisi boıynsha ázirlengen «Rassekaıa volny» atty plastıkalyq performansty kópshiliktiń nazaryna usyndy, dep habarlaıdy Egemen.kz Senattyń baspasóz qyzmetine silteme jasap.
Estý qabiletteri tómen ónerpazdar sahnalaǵan qoıylym kórermenderdi ertegiler álemine jetelep, ómirdiń fılosofııalyq mánine tereń úńilýdi jáne adamdar arasyndaǵy qarym-qatynasqa jańasha kózqaraspen qaraýdy úndeıdi.
Spektaklge Senat Tóraǵasy Máýlen Áshimbaev bastaǵan bir top senator arnaıy bardy. Palata Spıkeri teatr ártisteriniń sheberligin joǵary baǵalap, múmkindigi shekteýli azamattardy ortaǵa beıimdeýde jáne olardy ońaltýda ónerdiń atqaratyn róli zor ekenin aıtty. Sondaı-aq ol elimizde atalǵan sanattaǵy adamdardy qoldaýǵa eń joǵary deńgeıde basa mán berilip, bul baǵytta keshendi jáne júıeli jumys júrgizilip jatqanyn tilge tıek etti.
Sonymen qatar Senat Spıkeri ózderiniń qajyr-qaıratymen barsha kórermendi jigerlendirip júrgen «SENSITIVE» bı ansambliniń ujymyna jáne jobanyń kórkemdik jetekshisi, talantty jastardyń darynyn shyńdap, olardy jańa jetistikterge jetelep kele jatqan Olga Rostovshıkovaǵa alǵys bildirdi.
«SENSITIVE» teatry osydan 18 jyl buryn Petropavl qalasyndaǵy estý qabileti tómen balalarǵa arnalǵan mektep-ınternattyń bazasynda qurylǵan. Qazirgi tańda elimizben birge birqatar shet memleketterde de aty málim bul óner ujymy halyqaralyq baıqaýlar men festıvalderdiń laýreaty.