Osy jylǵy tasqyn sýdan 13 myńdaı jeke turǵyn úı zardap shekti. Senator Bıbıgúl Jeksenbaı óziniń depýtattyq saýalynda tótenshe jaǵdaılar kezindegi shyǵyndardy óteýdiń jańa joldaryn usyndy, dep habarlaıdy Egemen.kz joǵarǵy Palatanyń baspasóz qyzmetine silteme jasap.
Depýtattyń aıtýynsha, Qazaqstan aýmaǵynyń 75%-y tabıǵı apat qaýpi joǵary aımaqtarǵa jatatyndyqtan saqtandyrý máselesi erekshe nazar aýdarýdy talap etedi. Halyqaralyq tájirıbe kórsetikendeı, tabıǵı jáne tehnogendik apat aımaǵy bar elderde yqtımal aýqymdy shyǵyndarǵa baılanysty memlekettik-jekeshelik áriptestik arqyly arnaıy saqtandyrý qorlary men mindetti saqtandyrý júıesi jumys isteıdi. Shyǵyndardy jabý úshin memlekettik qorlar qurylady, jetekshi halyqaralyq qaıta saqtandyrýshylardyń mindetti qaıta saqtandyrý esebinen qarjynyń jınaqtalýy saqtalyp turady.
«Eshbir el óz aýmaǵynda bolǵan apat táýekelinen zalaldy derbes óteı almaıdy. Tabıǵı apattardan tótenshe jaǵdaılar kezinde keltirilgen zalal otandyq saqtandyrý júıesiniń damymaǵandyǵynan óte sırek óteledi. Mundaı jaǵdaıda zardap shekkenderdi turǵyn úımen qamtamasyz etý jáne olardyń qarjylyq máselelerin sheshý aýyrtpalyǵyn túgel derlik jergilikti atqarýshy organdar men QR-nyń Úkimeti kóteredi. Elimizde halyqty jyljymaıtyn múlikti mindetti saqtandyrýdy engizý múmkindigi sońǵy 20 jylda kezeń-kezeńimen talqylanyp keledi. Alaıda, bul baǵyttaǵy jumys júıeli, maqsattaǵy júrgizilmegendikten, elimizde saqtandyrý kompanııalaryna senim tómen, saqtandyrý mádenıeti qalyptaspaǵan», dedi Bıbıgúl Jeksenbaı.
Senator osyǵan baılanysty Úkimet basshysyna turǵyn úıdi mindetti saqtandyrýdy talqylaý úshin mekemearalyq komıssııa qurýdy usyndy. Tótenshe shyǵyndardy óteý turǵysynan otandyq saqtandyrý kompanııalarynyń múmkindikterine taldaý jasaý kerek. Tótenshe jaǵdaı qaýpi týraly aldyn alý sharalaryn qabyldaý barysynda halyqqa eskertý úshin barlyq jaǵdaıdy qarastyrý kerek. Odan basqa, halyqty tabıǵı apattan qorǵaýǵa baǵyttalǵan tıisti zań jobasy ázirlenýi tıis jáne onda qalpyna keltirilgen turǵyn úıdi azamattardyń menshigine berýdiń naqty tártibin retteý men saqtandyrý usynyldy.