Prezıdent qol qoıǵan «Qazaqstan Respýblıkasynyń keıbir zańnamalyq aktilerine halyqtyń kóshi-qony jáne qylmystyq-atqarý júıesi salalaryndaǵy zańnamany jetildirý máseleleri boıynsha ózgerister men tolyqtyrýlar engizý týraly» Zań – elimizde balalar qaýipsizdigin qorǵaýǵa baǵyttalǵan óte mańyzdy ári der kezinde qabyldanǵan qujat.
Quqyq qorǵaýshy retinde kámeletke tolmaǵandardyń jynystyq tıispeýshiligine qarsy qylmystar jasaǵandarǵa elimizdiń azamattyǵy berilmeıtini, sondaı-aq ondaı adamdardyń elge kirýine tyıym salynatyny týraly sheshimdi óte joǵary baǵalaımyn.
Jalpy, keıingi jyldary Memleket basshysy Qasym-Jomart Toqaevtyń bastamasymen elimizde otbasylyq zorlyq-zombylyqtyń aldyn alý, sonyń ishinde áıel men bala quqyn qorǵaý, sondaı-aq kámeletke tolmaǵan jasóspirimderge jynystyq qolsuǵýshylyqtyń jolyn kesýge baǵyttalǵan irgeli qadamdar jasalyp jatyr. Máselen, jýyrda Prezıdent qoldanystaǵy zańnamaǵa áıel quqyǵy men bala qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly zańdarǵa qol qoıǵany belgili. Sonyń ishindegi eń basty jańalyq – jasóspirimderge qarsy jynystyq zorlyq-zombylyq kórsetiletin bolsa, birden ómir boıyna bas bostandyǵynan aıyrý jazasy taǵaıyndalady. Buǵan deıin mundaı jazalar qoldanyla bermeıtin. Muny bala quqyn qorǵaý salasyndaǵy iri jeńis dep baǵaladyq.
Búgingi qabyldanyp otyrǵan zańnyń da áleýeti zor. О́kinishke qaraı, óz elimizde de pedofılder bar. Al eger syrttan kelip jatqan adamdardyń arasynda buryn balalarǵa jynystyq turǵyda tıiskender bolsa, olardy ishke kirgizý onsyz da kúrdelenip turǵan jaǵdaıymyzdy qıyndatyp jibereri haq. Pedofılııa qylmysyna barý – balany óltirgenmen teń. Olardyń bolashaǵyna balta shabý. Ondaı balany qaıta qalpyna keltirý, psıhıkasyn durystaý – qıynnyń qıyny. Sondyqtan búgingi tańdaǵy eń basty mindetimiz – balalardyń qaýipsizdigin qamtamasyz etý. Bul – kún tártibindegi kúıip turǵan másele. Olardyń qaýipsizdigin saqtaý men quqyn qorǵaý maqsatynda biz bunymen de shektelip qalmaýymyz kerek. Prezıdenttiń osy problemaǵa aıryqsha nazar aýdaryp otyrǵany qýantady.
Aıman OMAROVA,
quqyq qorǵaýshy