Sharof Rashıdov atyndaǵy Samarqand memlekettik ýnıversıteti bazasynda taıaýda Túrki áleminiń matematıkalyq qoǵamy (Turkic World Mathematical Society, TWMS) basqarma músheleriniń kóshpeli otyrysy ótti. Oǵan kórnekti ǵalym, professor, Qazaqstan Ulttyq Injenerlik akademııasynyń prezıdenti, Túrki álemi matematıkalyq qoǵamynyń prezıdenti, akademık Baqytjan Tursynuly Jumaǵulov tóraǵalyq etti jáne alǵashqy plenarlyq baıandamany jasady, dep habarlaıdy Egemen.kz.
B.Jumaǵulov baıandamasynda Túrki álemi matematıkalyq qoǵamynyń ózekti máselelerine basa nazar aýdardy, sondaı-aq otyrystyń negizgi maqsaty – ǵalymdardyń halyqaralyq baılanystary men ǵylymı yntymaqtastyǵyn keńeıtý, matematıka ǵylymyn damytýǵa jáne matematıkada, ǵylymı zertteýlerde, tehnıka men bilim berýde aqparattyq tehnologııalardyń jetistikterin paıdalanýǵa baǵyttaý ekenin atap ótti.
Forýmǵa qatysýshylardy quttyqtaǵan Samarqand memlekettik ýnıversıtetiniń rektory, senator Rýstam Halmýradov Túrki álemi matematık-ǵalymdary ekonomıkanyń, ekologııanyń qoldanbaly esepterin birlesip sheshý úshin shyǵarmashylyq toptar qurý qajet ekenin aıtty.
Otyrys barysynda Túrki álemi matematıkalyq qoǵamynyń (TWMS) vıse-prezıdenti, О́zbekstan UǴA akademıgi Ázimbaı Sadýllaev pen professor Mırsaıd Arıpov baıandama jasady. Atalǵan ǵalymdar О́zbekstan matematıkteriniń irgeli, esepteý jáne qoldanbaly matematıka salalaryndaǵy ǵylymı jetistikterin egjeı-tegjeıli baıandady.
Qazaqstandaǵy matematıka jáne matematıkalyq modeldeý ınstıtýtynyń dırektory, TWMS vıse-prezıdenti Mahmýd Sadybekov óziniń baıandamasynda Qazaqstan matematıkteriniń jarııalanymdyq belsendiligi jáne otandyq irgeli matematıkanyń taıaýdaǵy mindetteri týraly keńirek aqparat berdi.
Al Baký memlekettik ýnıversıtetiniń qoldanbaly matematıka ınstıtýtynyń dırektory, TWMS vıse-prezıdenti Alıev Fıkret óz baıandamasyn «Álemdik ǵylymı metrıkalyq bazalardaǵy TWMS jýrnaldaryn damytý» taqyrybyna arnasa, Ázerbaıjannan kelgen Baký ýnıversıtetiniń professory, TWMS vıse-prezıdenti Penahov Etıbar óz elindegi matematıkany jáne qoldanbaly matematıkany damytý máseleleri týraly sóz qozǵady.
Sondaı-aq TWMS vıse-prezıdenti Nurlan Temirbekov «О́ńirlik ekologııalyq saıasat baǵytyn qoldaý jáne sheshim qabyldaýǵa arnalǵan sıfrlyq analıtıkalyq platformany jasaý» taqyrybynda óte ózekti máselege arnalǵan baıandama jasady. Bul taqyrypta Qazaqstan men О́zbekstan ǵalymdary birlesip eńbek jasap jatqanyn jetkizdi.
Bizdiń elimizden ǵylymı is-sharaǵa Ulttyq Injenerlik akademııanyń Bas ǵalym hatshysy, UIA vıse-prezıdenti Ernar Imanǵalıev, О́.A. Joldasbekov atyndaǵy Mehanıka jáne mashınataný ınstıtýtynyń ǵylymı keńesshisi Amandyq Tóleshov qatysty.
Matematıka ǵylymyn damytýdyń jáne onyń kompıýterlik múmkindiktermen jáne óndirispen baılanysyn nyǵaıtýdyń mańyzdylyǵyn bári biledi. Jıynda osy baǵytty basshylyqqa ala otyryp, ǵalymdar qoıylǵan mindetterdi iske asyrýda matematıka ǵylymynyń rólin arttyrýǵa erekshe nazar aýdardy.
Samarqand ǵylymı forýmy ǵalymdarǵa pikir almasýǵa jáne matematıka ǵylymy salasyndaǵy sońǵy jetistikter týraly aqparat alýǵa tamasha múmkindik berdi.