Ulytaý oblysynda «Keńgir kerimsaly» atty respýblıkalyq poezııa festıvali ótti. Jas aqyndardyń qalamyn ushtap, talabyn arttyrý maqsatynda jasalǵan óleń merekesi oblys qurylǵaly birinshi ret uıymdastyryldy. Is-sharanyń ashylý saltanaty ortalyqtaǵy Abaı eskertkishiniń aldynda ótti. Jıylǵan jurtshylyq bas aqynnyń rýhyna taǵzym etip, gúl shoqtaryn qoıdy. Festıvalǵa qurmetti qonaq retinde «Otan» ordeniniń ıegeri Júrsin Erman, jyrshy, professor Almas Almatov, Abaı atyndaǵy memlekettik syılyqtyń laýreaty Ǵalym Jaılybaı, Qazaqstan Jazýshylar odaǵy basqarma tóraǵasynyń orynbasary Baýyrjan Jaqyp arnaıy shaqyryldy.
Ashylý rásiminen keıin ortalyqtandyrylǵan balalar men jasóspirimder kitaphanasynda «Jańa kezeń. Jas qalamger» dóńgelek ústeli ótti. Onda qonaqtar men jergilikti qalamgerler sóz sóılep, ádebıettiń damýy úderisi haqynda pikir almasty. «Keńgir kerimsaly» festıvali kemerine tolǵan Keńgirdiń sýy sekildi jyldan-jylǵa aıdyndanyp, aıbyndana beretin baıandy merekedeı kórinip otyr. Halyqaralyq deńgeıge shyǵatynyna da kámil senemin. Bul – poezııa saltanaty Ulytaý óńiriniń rýhanı ómirindegi úlken jańalyq», dedi Ǵ.Jaılybaı. Is-shara S.Qojamqulov atyndaǵy mýzykalyq drama teatrynda «Keńgirdiń qońyr keshinde» atty poezııa keshimen jalǵasyn tapty. Baýyrjan Jaqyp óleń oqyp, basqarma tóraǵasynyń quttyqtaýyn jetkizdi. «Jas aqyndardyń aldynda úlken jol kútip tur. Sol qasıetti sapar kıeli Ulytaý dalasynan bastalyp, Qazaqstan aspanyna jyr juparyn ańqytsa, ult rýhanııatyna úlken olja salyndy degen sóz», dedi ol.
Jezqazǵandyq tórt qalamger – Muqash Seıitqazınov, Ernur Seıdahmet, Sara Smaǵul, Tólesh Asanǵa múshelik bılet pen tósbelgi tapsyrý rásimi ótti. Sonymen qatar Ulytaý oblysy jas aqyndarynyń «Keńgir kerimsaly» antologııasy jáne jezqazǵandyq Janat Ábdiǵojınniń «Arnadym saǵan» kitaby oqyrmanǵa jol tartty.
Festıval jergilikti aqyn Muqaǵalı Seıitqazynyń «Maǵan seni jaqsy kórgen unaıdy» atty ádebı-sazdy keshimen aıaqtaldy.