«Qazaq gazetteri» seriktestiginiń basshylyǵy Iran Prezıdenti Ibrahım Raısıdiń qaza tabýyna baılanysty atalǵan eldiń Qazaqstandaǵy elshiligi mádenı ókildigine baryp, ıran halqyna kóńil aıtty, dep habarlaıdy Egemen.kz.
Seriktestik basshysy Dıhan Qamzabekuly Ibrahım Raısı syndy tulǵanyń jáne Úkimet delegasııasy músheleriniń mezgilsiz qazasyna oraı barsha qazaq halqymen birge «Qazaq gazetteri» ujymy da qaıǵyryp kóńil aıtatynyn jetkizdi. Sonymen qatar ol Iran Prezıdenti eliniń órkendeýine ólsheýsiz eńbek sińirip, halqyna qaltqysyz qyzmet etkenin, onyń izin basatyn elshil azamattardyń ıran halqynan kóptep shyǵýyna tilektes ekenin bildirip, kóńil aıtý kitabyna jazba qaldyrdy.
Irannyń Qazaqstandaǵy elshiliginiń mádenı keńesshisi Álı Akbar Talebı Matın marqum Ibrahım Raısıdiń qashanda halqynyń ortasynan tabylatyn parasatty basshy bolǵanyna, onyń jetekshiligi kezeńinde Iran men Qazaqstan arasyndaǵy áriptestik baılanystar nyǵaıa túskenine toqtaldy. Osynaý orny tolmas qazaǵa oraı qaıǵyryp kóńil aıtqan el basshylyǵyna, barsha qazaq halqyna rızashylyǵyn bildirdi.