Umytylmas ulttyq beıne

«Qaragóz» baleti synshylar tarapynan joǵary baǵaǵa ıe bolýda Balet óneri synshylary men sarapshylary nazaryn aýdartyp otyrǵan «Qaragóz» spektakli «Astana Opera» teatrynyń negizgi sahnasynda bıyl tuńǵysh ret qoıylǵan ulttyq týyndy bolyp sanalady. Bas partııany «Astana Opera» baletiniń jetekshi solısi Ánel Rústemova, basty keıipkerler – Syrym men Narshanyń beınesin talantty bıshi-ártister Arman Orazov pen Qazaqstannyń eńbek sińirgen qaıratkeri, «Astana Opera» baletiniń jetekshi solısi Taıyr Gataýov somdasa, Qazaqstannyń eńbek sińirgen qaıratkeri, «Astana Opera» teatrynyń jetekshi solısi Gaýhar Ýsına Qaragózdiń ájesi Mórjannyń rólin oınaıdy. Tusaýy jaqynda ǵana kesilgen ulttyq balet buqaralyq aqparat quraldarynda, sondaı-aq balet synshylary arasynda úlken qyzyǵýshylyq týǵyzýda. Pedagogıka ǵylymdarynyń doktory, QazUО́Ý professory Aıgúl Kúlbekova ózi­niń «Klassıkaǵa – erekshe qarym-qatynas» atty maqalasynda balet­tik spektakl kórkemdik tur­ǵydan kelisti bezendirilýimen kórer­mendi tań qaldyrǵanyn aıtady. «Kostıýmder, túster, jaryq, dekorasııalar – barlyǵy kórermenniń qabyldaý qabiletin eseleı túsetini sózsiz. Qoıýshy sýretshiler – Sofıa Tasmaǵambetova men Pavel Dragýnov horeograftyń ıdeıasyn tolyǵymen júzege asyrǵan deýge negiz bar» deıdi ǵalym premera týraly oılaryn ortaǵa salyp. О́nertaný doktory, P.I.Chaı­kovskıı atyndaǵy Máskeý konservatorııasynyń professory Elena Dolınskaıa, ár keıipkerge ózine tán qımyl-áreket túrleri bekitilgen horeografııa tili aldyn-ala úlestirilgenin tilge tıek etedi. Ol: «Qaragóz plastıkasynyń jumsaqtyǵy ásirese adajıo, balet­tiń lırıkalyq sharyqtaý sheginde aıryqsha kórinis tabady. Narsha – Qaragóz – Syrym mahabbat úshtiginde eki keıipkerdiń de jeke horeografııalyq boıaýy qanyq shyqqan desek, Qaragózdi qatty jaqsy kóretin ájesi Mórjan minezi kúrdeli, alaıda ata-baba zańdaryn berik ustanǵan keıipker retinde aıryqsha kózge túsedi» dep jazdy óz pikirinde. Eske sala keteıik, kompozıtor Ǵazıza Jubanova baletti Muhtar Áýezovtiń «Qaragóz» dramasynyń jelisi boıynsha 1987 jyly jazǵan bolatyn. Balettiń tusaýkeseri «Astana Operada» 2014 jyly 5 jeltoqsanda 2 bólimmen jáne 9 kórinispen, sondaı-aq rekvıemdegideı Prologymen jáne Epılogymen ótti. Mýzykalyq redaksııany «Astana Opera» teatrynyń mýzykalyq jetekshisi, Qazaq­stannyń eńbek sińirgen qaıratkeri Abzal Muhıtdınov jáne baletti qoıǵan Vakıl Ýsmanov (Almaty horeografııalyq ýchılıshesiniń túlegi, uzaq jyldar boıy Máskeýde jumys istep, 1988 jyly óziniń Máskeýlik V.Ýsmanov horeografııa teatryn qurǵan) jasaǵany kópshilikti beıjaı qaldyrmaıdy. Qos sheberdiń ıdeıasy ulttyq jobanyń sátti túıindelýine qyzmet etýiniń arqasynda Qaragózdiń klassıkalyq úlgidegi taǵy bir umytylmas beınesi dúnıege keldi dep senimdi túrde oıymyzdy shegeleı alamyz. Saltanat ÁSKERBEKQYZY. Sýrette: «Qaragóz» baletinen kórinis.