Ústimizdegi jyldyń sáýir aıynda Italııada ótetin Fiestalonia halyqaralyq konkýrsyna elimizdiń atynan soltústikqazaqstandyq Elvıra Nurǵojına qatysady.
Eske sala keteıik, ol ótken jyldyń qarashasynda Astanada uıymdastyrylǵan, elimiz ben Reseı, Ispanııa, Ýkraına jáne Italııa memleketterinen kelgen 86 ánshi synǵa túsken Fiestalonia Kazahstan halyqaralyq baıqaýynda ekinshi dárejeli dıplomǵa ıe bolǵan edi. Osy jetistik ánshige sonaý Italııa jerinde óner kórsetýge múmkindik berip otyr.
Bes jasynan beri án salýdy janyna serik etken ónerpaz qyz búginde qazaq ánin jat elde oryndaý úshin qyzý daıyndalyp jatyr. Onyń maqsaty – bedeldi konkýrsta Qazaqstandy laıyqty tanytyp, kórermendi baı mádenıetimizben tanystyrý.
E.Nurǵojına Petropavldaǵy óner kolledjin bitirip, odan keıin Almatyda mýzykalyq joǵary bilim alǵan. Qazaq, aǵylshyn, koreı jáne fransýz ánderin naqyshyna keltire oryndaı biletin jas talap qazirgi tańda óz repertýaryn tolyqtyrýdy kózdep júr.
Joldybaı BAZAR,
«Egemen Qazaqstan».