Jaqyn arada Astanada Túrikmenstan mádenıeti kúnin, Túrikmenstanda Qazaqstan mádenıeti kúnin ótkizý josparlanyp otyr. Bul týraly Premer-mınıstrdiń orynbasary – Syrtqy ister mınıstri Murat Nurtileý áriptesi Rashıd Meredovpen júrgizgen kelissózder qorytyndysy boıynsha málimdedi, dep habarlaıdy Egemen.kz
— Mádenı-gýmanıtarlyq yntymaqtastyq dástúrli túrde birqatar basym baǵyttardy toltyrady. Osy múmkindikti paıdalanyp, túrkimen delegasııasyn álemge áıgili aqyn Maqtymquly Fragıdiń 300 jyldyq mereıtoıymen quttyqtaımyn. Bul tarıhı tulǵanyń ádebı murasy túrki mádenıetiniń ortaq rýhanı qazynasy men dástúrin saqtap qalǵan túrkimen halqynyń danalyǵy men qaıtalanbas dúnıetanymyn kórsetedi. Elordamyzda uly aqyn eskertkishiniń saltanatty ashylýyn asyǵa kútemiz», dedi Murat Nurtileý.
Syrtqy ister mınıstrliginiń basshysy eki memleket basshylarynyń bastamalary aıasynda Astanada Túrikmenstan mádenıeti kúnin jáne Qazaqstan mádenıeti kúnin Túrikmenstanda ótkizýdi josparlanyp otyrǵanyn aıtty.
— Bıylǵy kúzde Túrikmenstanda mádenıet kúnderin ótkizýge daıynbyz. Ashhabad qalasynda kúıshi Qurmanǵazy men danyshpan, oıshyl Abaıdyń eskertkishterin ornatý týraly bastama kótergen túrikmen tarapyna úlken alǵysymdy bildiremin. Túrikmenstannyń Anaý qalasy bıyl túrki áleminiń mádenı astanasy atandy. Biz bilim jáne ǵylym salasyndaǵy baılanystardy keńeıtý maqsatynda joǵary oqý oryndarynyń ózara árekettesýine kómek kórsetýge kelisim bildirdi. Qazaqstandaǵy 28 joǵary oqý ornynda bilim alyp jatqan 2600-den astam túrikmenstandyq stýdentter eki eldiń jaqyndasýyna úles qosýda, - dep qosty Murat Nurtileý.