Jaıyq ózeniniń deńgeıi Inder aýdanynda birneshe kúnnen beri tómendeı bastady. Mahambet aýdanynda sý arnasy jeksenbiden beri kóterilgen joq. Degenmen bul aýdandaǵy Taldykól aýyly tasqyn sýdyń ortasynda tur.
Mahambet aýdany ákiminiń orynbasary Arman Ádilǵalıevtiń málimetine súıensek, 9 aýyldyq okrýgtegi 21 aýylda 30 900 adam turady. Al Jaıyq ózeni jaǵalaýyndaǵy 17 eldi mekenniń biri – Taldykól.
О́tken senbide Atyraý – Oral tasjolynan Taldykól aýylyna baratyn 7 shaqyrym joldy tasqyn sý basty. Sol sebepten atalǵan eldi mekendegi turǵyndardy qaıyqpen tasymaldaýǵa sheshim qabyldandy. Al jeksenbide taldykóldik turǵyndardy túgel evakýasııalaýǵa týra keldi.
«Beıbarys aýyldyq okrýgine qaraıtyn Taldykól eldi mekenindegi turǵyndar sany – 1 200-ge jýyq. Aýylda 223 úı, 5 kásipkerlik nysany bar. Birneshe kún buryn aýyl turǵyndaryn, onyń ishinde júkti analardy, balalar men múmkindigi shekteýli jandardy, egde jastaǵy qarııalardy Atyraý qalasyna kóshirgen edik. Endi aýylǵa kiretin joldy sý shaıýyna baılanysty aýyldaǵy barlyq turǵyndy qaýipsiz aımaqtarǵa kóshirýge sheshim qabyldandy», dedi A.Ádilǵalıev.
Onyń aıtýynsha, evakýasııalanǵan turǵyndar H.Dosmuhamedov atyndaǵy Atyraý memlekettik ýnıversıtetiniń jataqhanasyna ornalasty. Keıbiri týystarynyń úıine barýdy qolaıly kóripti.
«Ýnıversıtet jataqhanasynda barlyq jaǵdaı jasaldy. Turǵyndar úshin tósek-oryn jabdyǵy daıyndaldy. Úsh mezgil tamaq beriledi. Bizge eń bastysy, turǵyndardyń qaýipsizdigi, amandyǵy qajet», dedi A.Ádilǵalıev.
Turǵyndardy evakaýasııalaýǵa jergilikti áriptesterimen birge Mańǵystaý oblystyq tótenshe jaǵdaılar departamentiniń qutqarýshylary da jumyldy. Aǵa ınjener, azamattyq qorǵaý aǵa leıtenanty Ýálıhan Jumabekovtiń aıtýyna qaraǵanda, Taldykól aýlynyń turǵyndaryn evakýasııalaýǵa 24 qyzmetker, 6 qaıyq, 6 tehnıka tartylǵan.
«Aýyl turǵyndaryn mekteptiń janyna jınalýdy suradyq. Qaıyqpen tasymaldaý kezinde turǵyndardyń, ásirese, balalardyń qaýipsizdigine basa mán berildi», deıdi Ý.Jumabekov.
Taldykól aýlynyń turǵyny Gúlzıra Qabenovanyń aıtýyna qaraǵanda, tańerteńgi 8.00 shamasynda dabyl sırenasy oınaǵan. Turǵyndar qujattaryn, jol sómkesin ázirlep, aldyn ala evakýasııalaýǵa daıyn otyrǵan.
Tótenshe jaǵdaı departamenti qoǵammen baılanys tobynyń málimetine qaraǵanda, Taldykól aýylynan 121 adam, onyń ishinde 41 bala qaıyqpen evakýasııalandy. Atyraý qalasyndaǵy evakýasııalyq pýnktterge 26 adam jetkizildi. Al 90-nan asa adam týystarynyń úıine barǵan.
Keshe Tótenshe jaǵdaılar mınıstri Shyńǵys Árinov Atyraý oblysyna kelip, tasqyn sýǵa qarsy jumyspen tanysty. Qazir qutqarýshylar arnaıy tehnıkanyń kómegimen Qulsary qalasynda, Mahambet aýdanynyń Jalǵansaı aýlynda jáne Inder aýdanynda tasqyn sýdy sorý jumysyn júrgizip jatyr. Keshege deıin shamamen 7 mıllıon tekshe metr sý aıdaldy. Sońǵy táýlikte sorylǵan sý – 205 myń tekshe metr.
Al Taldykól aýlynda 167 turǵyn qalyp otyr. Onyń deni – er adam. Olar aýyldaǵy bógetti bekitý úshin qalýdy uıǵarypty. Al 10 áıel bóget bekitip júrgen turǵyndarǵa, áskerıler men tótenshelikterge tamaq daıyndaýdy qolǵa alǵan.
Atyraý oblysynyń jedel shtabynan málim etkendeı, polısııa qyzmetkerleri Taldykól aýlynda patrýldik baqylaýdy kúsheıtti. Maqsat – qaraýsyz qalǵan úıler men nysandarda talan-tarajǵa jol bermeý, qoǵamdyq tártipti saqtaý.
«Jaıyq ózenindegi sý deńgeıi kóterilip, aǵys qarqynynyń kúsheıýine baılanysty Mahambet aýdanyna qarasty Taldykól aýlyna sý basý qaýpi tóngen edi. Sol sebepten turǵyndarynyń deni evakýasııalanǵan aýylda qoǵamdyq qaýipsizdikti polısııa qyzmetkerleri qamtamasyz etýdi qolǵa aldy. Aýylda patrýldik baqylaý júrgizýge 14 polısııa qyzmetkeri, 5 patrýldik kólik tartyldy. Patrýldeý jáne kezekshilik táýlik boıy júrgiziledi. Turǵyn úıler men sharýashylyq maqsattaǵy nysandar táýlik boıy kúzetiledi», dep habarlady oblystyq jedel shtab.
Atyraý oblysy