Ańyz-tulǵa Leonardo da Vınchıdiń eń jumbaq ári qundy týyndylarynyń biri – La Bella Principessa Varshava kodeksiniń Sforsııadasynan alynǵan sýret. Qylqalam sheberiniń pergamenttegi jalǵyz týyndysy Qazaqstan jurtshylyǵynyń nazaryna usynylmaq.
Bul múmkindik Astanadaǵy Italııa elshiliginiń, ForteBank, Mastercard, Scripta Maneant jáne Italııa mádenıet ınstıtýtynyń, sondaı-aq elimizdiń Mádenıet jáne aqparat mınıstrliginiń qoldaýymen júzege asyrylady. Kórme Astanadaǵy Ulttyq mýzeıde 7 maýsym men 4 tamyz aralyǵynda ótedi.
La Bella Principessa – XV ǵasyrdyń aıaǵynda Leonardo da Vınchı salǵan ıtalııalyq aqsúıekter otbasynan shyqqan jas qyzdyń portreti. Italııa elshiliginiń habarlaýynsha, bul týyndy – sheberdiń jumbaq ári tartymdy týyndylarynyń biri. Buǵan deıin kartına álem boıynsha 5 ret qana qoıylǵan.
«Mádenıetti ilgeriletý – Italııa men Qazaqstan arasyndaǵy dıalogtiń qýatty qozǵaltqyshy. Leonardo – máńgilik talant pen shyǵarmashylyq ıesi. Onyń bir týyndysynyń
Astanadaǵy kórmesi – eki el arasyndaǵy yntymaqtastyqty nyǵaıtýdyń biregeı múmkindigi», deıdi Italııanyń Qazaqstandaǵy elshisi Marko Albertı.
«ForteBank» AQ basqarýshy dırektory Álııa Esjan da Leonardo da Vınchıdiń ólmes týyndysyn ár adam joǵary emosııamen tamashalaıtynyna senimdi.