Qazaqstan men Nıderland sý tasqynyna qarsy is-qımyl jáne sala mamandaryn daıarlaý jóninde memorandýmdarǵa qol qoıdy, dep habarlaıdy Egemen.kz Sý resýrstary jáne ırrıgasııa mınıstrligine silteme jasap.
Qujattarǵa qol qoıý rásimine atalǵan sala mınıstri Nurjan Nurjigitov, birinshi vıse-mınıstr Bolat Beknııaz jáne Nıderland memleketiniń Qazaqstandaǵy Tótenshe jáne О́kiletti Elshisi Nıkolaas Shermers qatysty.
Alǵashqy qujat – Sý resýrstary jáne ırrıgasııa mınıstrligi men Nıderland Syrtqy ister mınıstrligi arasyndaǵy ózara túsinistik týraly memorandým. Qujat sý sharýashylyǵy qurylystaryn salý jáne paıdalaný, sý tasqynyn boljaý jáne qarsy is-sharalardy josparlaý máselelerinde yntymaqtastyqty kózdeıdi. Kelisim tasqyn sýyn retteý men paıdalanýda tájirıbe almasý, sondaı-aq ózen aǵyndaryn basqarý bóliginde Nıderlandynyń tájirıbesin zertteýdi kózdeıdi.
Delft sý bilimi ınstıtýtymen (IHE Delft) qol qoıylǵan ekinshi memorandýmda sý salasy mamandaryn daıarlaý, sý salasynda ǵylym men ınnovasııalyq tehnologııalar salasyndaǵy ózara is-qımyl qarastyrylǵan.
«Búgingi kezdesý – Nıderland memleketimen qarym-qatynasymyzdyń mańyzdy kezeńi. Yntymaqtastyǵymyz aýqymdy jáne perspektıvaly jobalardy iske asyrýǵa kómektesetinine, al tájirıbe men tehnologııa almasý otandyq sý salasynyń áleýetin ashýǵa múmkindik beretinine senimdimin», dedi mınıstr Nurjan Nurjigitov.