Respýblıka boıynsha qolǵa alynǵan «Taza Qazaqstan» ekologııalyq aksııasy Jambyl oblysynda «Taza aýla. Taza ólke. Taza el» uranymen bastalyp, ár aptada «Kıeli meken», «Taza ólke», «Jasyl aımaq», «О́negeli urpaq», «Móldir bulaq» ataýlarymen jalǵasty.
Aksııa bastalǵaly beri óńirdiń 214 myń turǵyny is-sharaǵa belsendi túrde qatysty. Resmı derekke júginsek, 1 600-den asa tazalaý jumystary júrgizilgen. Jalpy alǵanda, óńirdi abattandyrý, kógaldandyrý jáne sanıtarlyq tazalaý jumystaryna qazynadan 9,4 mlrd teńge qarastyrylǵan.
«Taza Qazaqstan» ekologııalyq aksııasy aıasynda óńirdegi 60-tan asa tarıhı jáne mádenı eskertkishtiń mańaıy qoqystan tazartyldy. Mundaı jumys 143 saıabaq pen gúlbaqtarda jalǵasyn tapty. Budan bólek, 816,6 shaqyrym kanaldar men aryq-atyzdardy, 3,1 myń shaqyrym kóshe men 99 myń aýlany qoqystan tazartý jumysy júrgizildi. Sondaı-aq oblys boıynsha 60 myń kóshet egilip, 53 sýburqaq iske qosylǵanyn aıta ketken jón. Aksııa aıasyndaǵy jumystar jyl sońyna deıin jalǵasady.
Jergilikti atqarýshy bılik keltirgen derekke sensek, respýblıka deńgeıinde qolǵa alynǵan aksııa aıasynda turǵyn úıler men joldardy, turǵyndar ıgiligine salynǵan demalys aımaqtaryn jóndeý josparlanǵan. Jylytý maýsymyna daıyndalýǵa qazynadan 14,7 mlrd teńge bólindi. Bıyl oblysta 8,5 shaqyrym jylý jelisi jóndeledi.
Qazirgi kezde Taraz qalasynda «M-1» jylý magıstralin qaıta jańartý jumystary júrgizilip jatyr. Jylýmen jabdyqtaý jelisiniń jalpy uzyndyǵy 6,1 km quraıdy, onyń 4,7 km jańartylady. Jobanyń jalpy quny 10,7 mlrd teńgege baǵalanǵan. Qurylys jumystary bıyl qazannyń 1-ne deıin aıaqtalady.
Jergilikti bıliktiń aıtýynsha, jyl sońyna deıin 300 shaqyrymǵa jýyq kanaldy qosymsha tazartý kózdelgen. Búginde Tarazdaǵy Qapal, Úshbulaq, Qarasý-1, Qarasý-2, Tóregeldi kanaldaryn mehanıkalyq tazartý jumystary bastaldy.
Bıyl Taraz, Jańatas, Shý qalalarynda jáne Turar Rysqulov aýdanynyń Qulan aýylyndaǵy 79 turǵyn úıdi kúrdeli jóndeýden ótkizý úshin respýblıkalyq bıýdjetten 5,9 mlrd teńge qarastyrylǵan. Sonymen qatar Taraz qalasynyń kommýnaldyq menshigindegi 6 úıde 99,6 mln teńgege aǵymdaǵy jóndeý jumystary júrgizildi. Al «Qarataý qurylys- 2030» JShS 685 mln teńgege 11 kóppáterli turǵyn úıdiń sáýlettik kelbetin jaqsartý jumysyn bastaıdy.
Jambyl oblysy