Almaty oblysyndaǵy «Qobylandy» ıppodromynda jastar arasynda teńge ilýden XVIII Qazaqstan chempıonaty aıaqtaldy. Jarysqa elimizdiń 10 oblysy men 2 qalasynan kelgen sportshylar qatysty.
«Byltyr jalpy sany 25 sportshy qatysqan bolsa, bıyl tek jastardyń arasynda 35 sportshy bar. Osy jastar jáne jasóspirimder chempıonatynda jalpy sany 75-ke jýyq sportshy baq synap jatyr», dedi Teńge ilý federasııasynyń atqarýshy dırektory Aıbek Túrkebaı.
Jarys nátıjesinde «Bes beles», «Qos qulash» jáne «Jeti qut» stılderi boıynsha jeńimpazdar anyqtaldy. Atap aıtsaq, «Bes beles» stılinde birinshi oryndy Ulaǵat Amangeldi (Shymkent), ekinshi oryndy Qanat Baqtybaı (Túrkistan oblysy) ıelense, úshinshi oryndy Erasyl Qoqanbaı (Qyzylorda oblysy) men Azat Ámirbekov (Shymkent) bólisti.
Al «Qos qulash» stılinde Arnur Shalhar (Túrkistan oblysy) jeńimpaz boldy. Ekinshi oryndy Nuráli Ersin (Almaty oblysy), úshinshi oryn ıegerleri Daryn Myrzaǵalı (Almaty qalasy) men Rýslan Seıdahmet (Qyzylorda oblysy) atandy.
Teńge ilýden «Qos qulash» stıli boıynsha ekinshi oryn jeńimpazy atanǵan Almaty oblysynyń sportshysy Nuráli Ersin barlyq sportshy jaqsy daıyndyqpen kelgenin, qarsylastarynyń da keremet óner kórsetkenin alǵa tartty.
Sondaı-aq «Jeti qut» stılinde birinshi orynǵa Meıirjan Jumash (Shymkent qalasy), ekinshi orynǵa Ernur Serikbaı (Túrkistan oblysy) ıe bolsa, úshinshi oryn Nurıslam Namazbaı (Jambyl oblysy) men Erbolsyn Maqashevqa (Batys Qazaqstan oblysy) buıyrdy.
Eske salar bolsaq, respýblıkalyq teńge ilý federasııasy Ulttyq sport qaýymdastyǵynyń quramyna kiredi. Qaýymdastyq quramynda budan ózge báıge, kókpar, aýdaryspaq, jamby atý, sadaq atý, qusbegilik, asyq atý, «Joryq» at sporty jáne basqa da federasııalar bar.
Almaty oblysy