Bıyl qazaq ádebıetiniń klassıgi, jazýshy Berdibek Soqpaqbaevtyń týǵanyna 100 jyl. Memleket basshysy Qasym-Jomart Toqaevtyń bastamasymen qalamgerdiń ǵasyrlyq toıy óńir-óńirde jalǵasyp, túrli aýqymdy jobalar atqarylyp jatyr. Aıtýly datanyń IýNESKO kóleminde atap ótilip jatqany da jazýshy murasyn myńjyldyq etýge sep bolary sózsiz. Osy oraıda Ulttyq kitaphanada qabyrǵaly qalamgerdiń túrik tiline aýdarylǵan «О́lgender qaıtyp kelmeıdi» kitabynyń tusaýkeser rásimi ótti.
Alqaly jıynǵa TÚRKSOI halyqaralyq uıymynyń Bas hatshysy Sultan Raev, MAM Arhıv, qujattama jáne kitap isi komıtetiniń tóraǵasy Rýstam Álı, Túrkııa Respýblıkasynyń Almaty qalasyndaǵy Bas konsýly Evren Mýderrısoǵly, Almaty oblysy Mádenıet, arhıvter jáne qujattama basqarmasynyń basshysy Danııar Alıev, memleket jáne qoǵam qaıratkerleri, zııaly qaýym qatysty.
«Mádenıet jáne aqparat mınıstrligi qoǵamdyq mańyzy bar ádebıetterdi basyp shyǵarý baǵdarlamasy aıasynda Berdibek Soqpaqbaevtyń kóptomdyq kitabyn eki ret basyp shyǵaryp, elimizdiń barlyq kitaphanalaryna taratqan bolatyn. Kórnekti jazýshynyń oqyrmandary jyldan-jylǵa artyp kele jatqany qýantady. Endi olardyń qataryn túrik baýyrlarymyz da tolyqtyryp otyr», dedi MAM Arhıv, qujattama jáne kitap isi komıtetiniń tóraǵasy Rýstam Álı.
Sheber sýretkerdiń qalamynan týǵan romannyń túrikshe nusqasy 2000 danamen basylyp shyqqan. Aýdarǵan – túrik jazýshysy Hýseın Varol.
«О́lgender qaıtyp kelmeıdi» – jastyq shaǵy soǵystyń aýyrtpalyǵymen qatar kelgen taǵdyrlardy sýretteıdi. Budan bólek qalamgerdiń «Meniń atym Qoja», «Balalyq shaqqa saıahat», «16 jasar chempıon» syndy shyǵarmalary da oqyrmanǵa etene tanys, erekshe ystyq.
Aıta keteıik, jazýshynyń eńbekteri búginge deıin álemniń birneshe tiline tárjimelengen. Al túrik jazýshysy aýdarmaǵa eki jyl ýaqytyn jumsapty. Sondaı-aq ol aýdarma kezinde romannyń qıynǵa soqqan tustaryn atap ótti.
«Alystan alty jasar bala kelse, alpystaǵy qart sálem beredi». Bul – qazaqta sálemniń mańyzdylyǵyn, dástúrin kórsetetin sóz. Túrikterde de sálemdesýdiń maǵynasy tereń. Osy syndy maqal-mátelderdi, aýyldyń turmys-tirshiligine baılanysty sózderdi aýdarý qıyn boldy», deıdi jazýshy Hýseın Varol.
Al TÚRKSOI Jazýshylar odaǵynyń tóraǵasy Ulyqbek Esdáýlet tulǵa mereıtoıyn atap ótý shetelde bastalyp ketkenin aıtty.
«24 qazanda týǵan jeri Almaty oblysynyń Raıymbek aýdanynda, Narynqolda halyqaralyq deńgeıdegi IýNESKO-nyń, TÚRKSOI-dyń deńgeıindegi mereıtoı is-sharalary ótkiziledi. Jalpy, Berdibek Soqpaqbaevtyń 100 jyldyq mereıtoıy Túrkııada bastalǵan», dedi ol.
Is-shara aıasynda Berdibek Soqpaqbaevtyń shyǵarmashylyǵyna arnalǵan kitap kórmesi de uıymdastyryldy.
Eske sala keteıik, buǵan deıin «Meniń atym Qoja» shyǵarmasy da túrikshe sóılegen edi.
Mádenıet jáne aqparat mınıstrliginiń habarlaýynsha, ǵasyrlyq mereıtoı aıasynda qalamgerdiń týǵan aýly Narynqolda eńseli eskertkishi boı kóteredi. Sondaı-aq jazýshynyń esimi birqatar saıabaqqa, bilim oshaǵy men oblystyq kitaphanaǵa berilmek.