Úlken-kishiniń júreginde Otanǵa degen súıispenshilikti oıatý maqsatynda júrgiziletin is-sharalardyń aýqymy zor. Mańǵystaýda Memlekettik rámizderdi nasıhattaý arqyly patrıotızmdi qalyptastyrý, azamattardyń boıyndaǵy ultjandylyq qasıetin oıatý, Otanǵa degen adaldyǵyn arttyrýǵa jumyldyrý maqsatynda «Patrıot bol!» jobasy bastaldy.
1 maýsymnan bastap 30 qarasha aralyǵyna josparlanǵan joba birneshe baǵyt boıynsha júzege asyrylady. Erekshe, qyzyqty baǵyttardyń biri – «Patrıot taksı». Taksı qala, aýdan kóshelerin aralap, jolaýshylardy dittegen jerine tegin jetkizedi. «Patrıot taksıine» otyrǵan ár jolaýshy úsh kezeńnen turatyn ıntellektýaldyq oıynǵa qatysady. Taksı júrgizýshisi qoıǵan suraqtarǵa múdirmeı jaýap bergen jolaýshy arnaıy syılyqtarǵa ıe bolady. Sondaı-aq «Bile júrińiz!» aıdarynda taksı jolaýshylaryna memlekettik rámizderdiń maǵynasy, táýelsiz el bolyp qalyptasýymyzǵa úles qosqan uly tulǵalardyń azamattyq eńbekteri men qyzmet joly týraly maǵulamattar aıtylady.
– Joba ókilderi qoǵam, BAQ ókilderi, úkimettik emes uıymdar, memlekettik organdar jáne jobany qoldaýshylarmen birlese qyzmet atqarýdy kózdeıdi. Igi bastamaǵa áleýmettik jeli qoldanýshylary da qoldaý kórsete alady, – deıdi osy bastamany uıymdastyrýshylardyń biri rejısser Álııa Isaeva.
Sonymen qatar Rámizder kúni Aqtaý qalasynyń kóshelerinde memlekettik standandartqa sáıkes 60 memlekettik tý ornalastyrylyp, memlekettik rámizderdi nasıhattaýǵa baǵyttalǵan 2 qoǵamdyq avtobýs brendteldi. Osy aıshyqty kúnniń mártebesin kóterýge arnalǵan 1 500 adamnyń qatysýymen ashyq aspan astyndaǵy qoǵamdyq-tarıhı is-shara uıymdastyryldy.
Mańǵystaý oblysy