«Egemen Qazaqstan» gazetiniń búgingi sanynda Qazaqstan Respýblıkasynyń Memlekettik keńesshisi Erlan Qarınniń «Birlik pen damý: Memleket basshysy Qasym-Jomart Toqaevtyń saıası baǵdarynyń basty negizderi» atty kólemdi maqalasy jaryq kórdi, dep jazady Egemen.kz.
Erlan Qarın maqalasynda Qazaqstandaǵy reformalyq ózgeristerdiń el órkendeýi jolyndaǵy yqpalyn saralaǵan. Ol memlekettiń myzǵymas tuǵyryn qalyptastyrýda eskishildik pen órkenıetti damý joly eshqashan bir arnaǵa toǵyspaıtynyn atap ótedi.
«2022 jyly qoǵam ókilderiniń usynysymen Májilis jáne máslıhat depýtattaryn aralas saılaý júıesi engizildi. О́kinishke qaraı, is júzinde bir mandatty okrýgterdiń keıbireýinde oń úrdispen qatar jaǵymsyz jaıttar da boldy. Ashyǵyn aıtsaq, birqatar okrýgte baǵdarlamalar men ıdeıalarǵa negizdelgen erkin báseke túrindegi saıası kúreske kýá bola almadyq. Onda aldymen rýshyldyqqa jol berildi. Tipti keıbir jerde qylmystyq toptar bılikke enýge de áreket jasady», dep keı bastamalardyń kóleńkeli tustaryn da ashyq talqy tarazysyna saldy.
Memlekettik keńesshi maqalasynda jańa qoǵamdyq etıka qalyptastyrýdyń mańyzyna toqtalady.
«Jańa saıası mádenıet qalyptastyrmaı, jasampaz qundylyqtar negizinde qoǵamdyq etıkany jańartpaı, ádiletti qoǵam qurý múmkin emes ekeni aıdan anyq», dep jazdy Erlan Qarın.
Ol maqalasynda atalǵan ıdeıany júzege asyrý sheńberinde memlekettik minberde atqarylyp jatqan jumystardy da baıandady.
«Ulttyq quryltaıdaǵy bastamalardy júzege asyrý úshin 40 tarmaqtan turatyn keshendi jospar bekitildi. Osy qujattyń aıasynda jyl sońyna deıin 9 zań qabyldaý josparlanǵan. Qazirdiń ózinde onyń úsheýin Parlament maquldap, Prezıdent qol qoıdy. Jaqynda «Zańsyz oıyn bıznesine jáne lýdomanııaǵa qarsy is-qımyl jónindegi keshendi jospar» bekitiledi. Sondaı-aq basqa da tujyrymdamalyq qujattar ázirlep, naqty jobalar men is-sharalardy júzege asyrý qarastyrylǵan.
Jalpyulttyq qundylyqtardy ádistemelik turǵyda negizdeı otyryp, jan-jaqty dáripteýdiń ádettegi jalań úgit-nasıhattan aıyrmashylyǵy – bul tásil birden nátıje bermese de, strategııalyq jaǵynan alǵanda áldeqaıda tıimdi. Jańa qundylyqtar júıesi ár azamattyń minez-qulqy men kúndelikti is-áreketi arqyly qalyptasýy kerek. Sol sebepti, bılik «Taza Qazaqstan» ekologııalyq aksııasyna basa mán berip otyr», dep jazdy Memlekettik keńesshi.
Erlan Qarınniń el damýy jolynda túıindegen ózge de tujyrymdaryn myna jerden oqı alasyzdar.