Keńes Odaǵynyń Batyry, Halyq qaharmany táýelsiz Qazaqstannyń tuńǵysh Qorǵanys mınıstri armııa generaly Saǵadat Nurmaǵambetovtyń 100 jyldyǵyna arnalǵan is-sharanyń saltanatty ashylýy dańqty maıdanger, asa kórnekti áskerı qolbasshynyń esimimen atalatyn Qurlyq áskerleriniń áskerı ınstıtýtynda ótedi, dep habarlaıdy Egemen.kz Qorǵanys mınıstrliginiń baspasóz qyzmetine silteme jasap.
Jıyn 16-22 maýsym aralyǵynda «Álı» polıgonynda uıymdastyrylady. О́tken jyly oǵan alań ıeleri - Qazaqstanmen birge Ázerbaıjan, О́zbekstan elderiniń ókilderi ǵana qatysqan bolsa, bıyl bul tizimge Belarýs, Qyrǵyzstan, Reseı komandalary qosylady. Bul áskerı-patrıottyq jıynǵa qyzyǵýshylyqtyń artyp kele jatqanyn ańǵartady.
Elimizdiń túkpir-túkpirinen jıynǵa Qarýly kúshter, basqa da áskerler men áskerı quralymdary áskerı-patrıottyq klýbtarynyń, armııa generaly Saǵadat Nurmaǵambetov atyndaǵy Qorǵanys mınıstrligi áskerı kolledjiniń, «Jas ulan» respýblıkalyq mektepteriniń, «Arystan» mamandandyrylǵan lıseıiniń, oblystyq áskerı mektep-ınternattardyń tárbıelenýshileri qatysady. Jalpy sany jıynda 14-17 jas aralyǵyndaǵy 750 ul men qyz baby men baǵyn talastyrady.
Aıbyndyqtar AK-74 avtomatyn tolyq bólshekteý jáne qurastyrý, pnevmatıkalyq vıntovkadan atý, beltemirde tartylý, deneni shalqasynan jatyp kóterý, arqan tartý, 1000 jáne 3000 metr qashyqtyqqa júgirý, áskerılendirilgen estafeta jáne «Kúshimiz birlikte» áskerı-dalalyq taktıkalyq oıyndarynda synǵa túspek. Sondaı-aq «Aıbyn daryny» zııatkerlik oıyny jáne «Aıbyn juldyzy» shyǵarmashylyq baıqaýy uıymdastyrylady.
Áskerı-patrıottyq jıynǵa qatysýshylar úshin konsertter, dárister, sporttyq oıyndar, ot jaǵý keshteri jáne armııa generaly Saǵadat Nurmaǵambetov týraly fılmder kórsetilimi bar qyzyqty baǵdarlama daıyndalǵan. Sonymen birge áskerı tehnıka, jabdyqtar, sporttyq múlikter men stendter jáne klýbtardyń qyzmeti týraly kórme ázirlenedi.
Jıyn ultaralyq jáne halyqaralyq dostyqty nyǵaıtýǵa, áskerı-patrıottyq tárbıeni jetildirýge, áskerı qyzmetti tanymal etýge jáne Qarýly kúshterdiń ımıdjin arttyrýǵa baǵyttalǵan.