Batys Qazaqstan oblysynda kóktemde sý basqan eldi mekenderde tirshilik qalypqa kele bastady. Máselen, Qaratóbe aýdany Qorjyn aýyly bıylǵy kóktemde alapat sý tasqynynan zardap shegip, úı-jaı men qora-qopsy túgel sý astynda qalǵan edi. Tabıǵat apatynan adam aman qalǵanymen, 970 bas qoı-eshki, 80 bas iri qara, on shaqty jylqy qurban boldy.
Árıne, qapııada qıyn jaǵdaıǵa tap bolǵan aýyl turǵyndarymen Memleket basshysy Qasym-Jomart Toqaev ózi arnaıy kelip jolyǵyp, memleket tarapynan barlyq kómek jasalatynyn aıtqan bolatyn. Qazir aýylda 90 úıdiń qurylysy bastalyp ketti. Shyǵyn bolǵan malǵa ótemaqy tólenip, múliktiń de orny tolyp jatyr.
Budan bólek, aýyl turǵyndary elimizdiń túkpir-túkpirinen kelgen gýmanıtarlyq kómek «tasqynynyń» astynda qaldy. Munyń ózi eldiń eńsesin tiktep, kóńilin kótergen eldik is-shara bolǵany ras. Osyndaı qoldaý áli kúnge jalǵasyp jatyr.
Jaqynda Qaratóbe aýdanynyń Aqqozy aýyldyq okrýgine Qaztalov aýdanynan arnaıy kómek jetti. Qaztalov aýdany ákiminiń orynbasary Rashıt Imanǵalıev bastaǵan delegasııa Aqqozy turǵyndaryna 23 bas iri qara, 46 qoı men eshki, 5 bas jylqy malyn tabys etti. Aýdan turǵyndarynyń ıgi bastamasyna aqqozylyq aǵaıyn erekshe rıza boldy.
«Bıyl sý tasyp, aýylymyz qıyn jaǵdaıǵa tap boldy. Mundaı tasqyndy birinshi ret kórdik. Buryn sý kelgenimen, aýyldyń shetin aınalyp qana ótetin. Al bıylǵy tasqyn qatty boldy. Aýyl azamattary barlyq turǵyndy mektepke kóshirip, adam shyǵyny bolmady. Degenmen usaq mal, keı turǵyndardyń iri qara maly sýǵa ketti. Búginde onyń da orny tolyp jatyr. Kómek qolyn sozyp, qoldaý kórsetkenińizge aýyl halqy atynan rahmet aıtamyz», deıdi aýyl turǵyny, kópbalaly ana Asyltas Maqulova.
Qaztalov aýdanynan jetken jylý negizinen aýdannyń sharýa qojalyqtarynan jınalǵan. Jomart jandar endi sý tasqyny kezinde tórt túlik maly shyǵyn bolǵan ózge aýdandarǵa da kómektespek nıette eken.
Sonymen qatar bıylǵy alapat sý tasqynynda Oral qalasynyń mańynda 9 myńdaı saıajaı úıi sý astynda qalǵan bolatyn. Úkimettiń sheshimimen tabıǵat apaty saldarynan jalǵyz baspanasy jaramsyz dep tanylǵan otbasylarǵa úı berile bastady.
Mine, jaqynda Oral qalasynda 52 saıajaı turǵyny baspanaly boldy. Ákimdik habarlaǵandaı, jańa páterler demeýshiler qarjysyna alynǵan. Úkimet basshysynyń tapsyrmasyna sáıkes, qarjylyq uıymdar men demeýshiler óńirdegi zardap shekken turǵyndarǵa qol ushyn sozyp, kómegin berip jatyr.
«Jubaıymyz ekeýmiz 2-saıajaı ýchaskesinde turdyq. Sý tasqyny kezinde jalǵyz úıimiz sýǵa ketti. Memleket bizdi dalada qaldyrmady. Búgin, mine, jańa páterge qonystanyp otyrmyz. Prezıdentimizge rahmet», deıdi eki aı buryn saıajaıdaǵy jalǵyz baspanasyn sý alǵan Rızabek Aıtqalıev.
Jańa qonys ıeleriniń biri Rıta Eralıevanyń da qýanyshynda shek joq.
«Qıyn kúnder artta qaldy. Jaqsylyqtan úmitimizdi úzbedik. Memleket tarapynan jasalǵan qoldaý bizge demeý boldy», deıdi ol.
«Oral qalasynda saıajaı aýmaǵyndaǵy jalǵyz baspanasy sýǵa ketip, apatty dep tanylǵan turǵyndarǵa jańa úıler satyp alý jáne salý boıynsha jumys aldaǵy ýaqytta da júrgiziledi», deıdi oblys ákiminiń baspasóz hatshysy Erhan Tátken.
Aıta keteıik, bıylǵy tasqyn kezinde 8 732 saıajaı úıi sý astynda qaldy. Onyń 2 579-y – «jalǵyz baspana» dep tanylǵan bolatyn.
Batys Qazaqstan oblysy