Sáýirdiń basynda Torǵaı ózeniniń kúrt tasýynan Nura, Belsher, Mamyr aýyldarynyń úıleri túgel sý astynda qaldy. Nura aýylynda 100-den astam, Mamyrda 25 úı, Belsherde tórt úı sýǵa ketse, kóktemde qanshama maldy tosynnan kelgen topan sý aǵyzyp ketti. Turǵyndar tikushaqpen Yrǵyz eldi mekenindegi úsh mektepte ashylǵan evakýasııalyq ortalyqqa ornalastyryldy. Sodan beri áli evakýasııalyq ortalyqta turyp jatqandar bar.
«Nura – berekeli aýyl. Biz tórt túlik ósirip, baqsha salyp, óz eńbegimizben kún kórip otyrǵan jandarmyz. Ata-babamyzdyń qonysyn tastap eshqaıda ketpeımiz. Aýylymyzdy saqtap qalǵymyz kelgenimen, mektebi bolmasa, jurt balasyn oqytý úshin jan-jaqqa kóship ketedi. Ásirese jastar turmaıdy. Mine, jaz bastaldy. Biraq qurylystyń qazyǵy qaǵylyp jatqan joq. Úıimiz qashan salynyp bitedi? Osyǵan alańdaýlymyz. Bizdiń aýylǵa jańa mektep kerek. Buryn salynǵan jańa mektebimiz sáýirden beri sý ortasynda tur. Ol endi paıdaǵa aspaıtyn qurylys. Aýyldyń syrtyndaǵy bıikteý dóńdegi Saryobada jańa baspanalar turǵyzylady dep aıtylyp jatyr. Nuranyń jurty da osy jerdi qalap otyr. Bul jerge qansha úı salynatynyn naqty kórsetip, turǵyndarǵa esep berse deımiz», deıdi Yrǵyz aýdany Nura eldi mekeniniń turǵyny Qaırat Aıjarqynuly.
Evakýasııalyq ortalyqta turyp jatqan úsh aýyldyń turǵyndary Nura aýylynyń qyr betindegi Saryobada salynatyn bolsa, qujat júzinde sheshim shyǵaryp, jerimizdi naqty belgilese, Mamyr aýylyna bóget salynsa degen ótinish talabyn aıtyp otyr. Onymen qosa jurt jańa úılerdiń gaz qondyrǵysymen jabdyqtalǵanyn suraıdy. О́ıtkeni onsyz da úısiz qalyp, dúnıe-múlkinen aırylǵan jurt qystaı kómir men otyn izdep taǵy áýrelenedi. Olarǵa gazben jylytylatyn úılerde turý yńǵaıly», degen Nura aýylynyń turǵyny, úıi sýǵa ketken Q.Aıjarqynulynyń saýalymen Yrǵyz aýdanynyń ákimi Nurlan Qyzbergenovke habarlastyq. Aýdan basshysy úıleri sý astynda qalǵan Nura, Mamyr, Belsher eldi mekeniniń turǵyndary úshin Yrǵyz aýdanynyń ortalyǵynda jańa úı qurylysy salyna bastaǵanyn aıtty. Nura aýylynyń qasyndaǵy Saryobada jer belgilenip, jaqyn aralyqta qurylys bastalatynyn habarlady. Sondaı-aq úıleri sýǵa ketken aýdan turǵyndaryna birjolǵy áleýmettik tólemder tolyq tólenipti.
Oblys ákimi baspasóz qyzmetiniń jetekshisi Gúlbaǵda Kóbeevanyń habarlaýynsha, Yrǵyz aýdanynyń ortalyǵyndaǵy evakýasııalyq ortalyqta áli kúnge deıin adamdar turyp jatyr. О́ıtkeni tasqyn sýdyń beti áli qaıtpaǵandyqtan, Nurada sý basqan úılerdi baǵalaý múmkin bolmaı tur. Al Yrǵyz aýdany boıynsha úıleri sýǵa ketken adamdarǵa birjolǵy áleýmettik tólemder, mal shyǵyny tólemderi berildi. Úılerdi baǵalaý jumystary sý qaıtqan soń bastalmaqshy.
Maýsym aıy týsa da, Torǵaıdyń sýy áli qaıtqan joq. Turǵyndar kóktemde sý buzyp ketken «Nura-Yrǵyz» tasjolymen qazir aýyr júk kólikteri óte almaı jatqandyǵyn, ony kóterýge oblys ortalyǵynan qosymsha tehnıka jetkizilýin suraıdy.
Aqtóbe oblysy