Majarstannyń astanasy – Býdapeshte kúres túrlerinen halyqaralyq týrnır ótip jatyr. Osy jarysta jaqsy nátıje kórsetken balýandar UWW reıtınginde joǵarylaıdy. Al onyń paıdasy Olımpııa oıyndarynyń jerebe tartylatyn kezde anyq seziledi.
9 maýsymǵa deıin sozylatyn dúbirli dodada Parıj Olımpıadasyna qatysqan balýandardyń barlyǵy, basqa da sportshylar kúsh synasady. Jarys jolyna shyǵatyn 313 qatysýshynyń 134-iniń qorjynynda joldama bar. Grek-rım kúresinen ótetin básekede qazaq eli namysyn Aıdos Sultanǵalı (60 kg), Demeý Jadyraev (77 kg), Nursultan Tursynov pen Shámil Ojaev (86 kg) jáne Álimhan Syzdyqov (130 kg) qorǵaıdy. Erkin kúres sheberleriniń tartysynda Azamat Dáýletbekov (86 kg), Álisher Erǵalı men Rızabek Aıtmuhan (97 kg) jáne Iýsýp Batyrmurzaevtyń (125 kg) ónerin tamashalaımyz. Áıelder kúresinen Emma Tısına men Marına Sedneva (55 kg), Dıana Kaıýmova men Irına Kýznesova (59 kg), Irına Kazıýlına (65 kg) jáne Jámılıa Baqbergenova men Gúlmaral Erkebaeva (72 kg) bozkilemge shyǵady.
– Bul Olımpıada qarsańyndaǵy eń sońǵy synaq. Býdapeshtegi básekeden keıin qorytyndy reıtıng shyǵarylady. Sonyń negizinde tórtjyldyqtyń basty dodasynyń jerebesi tartylady. Iаǵnı reıtıngte joǵary turǵan balýandar ózinen birshama tómen jaıǵasqan sportshylarmen sheberlik baıqasady. Bul múmkindikti biz qalt jibermeýge tıispiz. Qazirgi kezde Azamat Dáýletbekovtiń ǵana esebi túgel. Ol reıtıngte birinshi orynda tur. Qalǵandarynyń upaıy kem. Majarstanda sol olqylyqtyń ornyn toltyrýǵa barynsha kúsh salýǵa tıispiz, – deıdi erkin kúresten memlekettik jattyqtyrýshy Dastan Qanatqanov.
Esterińizge sala keteıik, Qazaqstan quramasynyń qorjynynda Olımpıadanyń jeti joldamasy bar. Onyń tórteýin grek-rım kúresinen ıelensek, úsheýi erkin kúres sheberleriniń enshisinde. Al áıelder kúresiniń ókilderine birde-bir lısenzııa buıyrmady.