Bul jóninde Senat Tóraǵasy Palata otyrysynda mass-medıa týraly zańdy qaraý barysynda aıtty. Máýlen Áshimbaev keshe qazaq tilinde kontent jasap júrgen kreatıvti ındýstrııa ókilderiniń forýmynda osy másele keńinen talqylanǵanyn aıtyp, olardy qoldaý mańyzdy mindet ekenin aıta ketti, dep habarlaıdy Egemen.kz.
Senat spıkeriniń aıtýynsha, balalarǵa arnap qazaq tildi kontent jasap júrgen jandar birqatar máseleniń bar ekenin aıtqan. Bul rette ol qazaqsha kontentti jiti baqylaýǵa alyp, aldaǵy ýaqytta tıisti taraptarmen jumys jalǵasatynyn tilge tıek etti.
«Keshe kreatıvti ındýstrııa ókilderiniń forýmyna qatystyq. Sol jerde qazaq tilinde balalarǵa arnalǵan kontent jasap júrgen mamandar biraz problemany kóterdi. Onyń ishinde qarjylandyrý, marketıng, aqparattarǵa qoljetimdilikti qamtamasyz etý sııaqty ózekti máseleler bar. Osyǵan baılanysty búgin qaralyp jatqan zań aıasynda balalarǵa arnap qazaqsha kontentter jasaıtyn jastardy, ujymdardy qoldaý tetikterin de nazarǵa alýymyz kerek. Memleket tarapynan kórsetiletin mundaı qoldaý bir rettik emes, júıeli túrde bolýǵa tıis. Senat aldaǵy ýaqytta osy baǵytta múddeli taraptarmen tıisti jumysty jalǵastyrady», dedi Máýlen Áshimbaev.
Eske sala keteıik, búgin Palata otyrysynda senatorlar «Mass-medıa týraly» zańdy jáne oǵan ilespe «Qazaqstan Respýblıkasynyń keıbir zańnamalyq aktilerine mass-medıa máseleleri boıynsha ózgerister men tolyqtyrýlar engizý týraly», «Qazaqstan Respýblıkasynyń Ákimshilik quqyq buzýshylyq týraly kodeksine mass-medıa máseleleri boıynsha ózgerister engizý týraly» zańdardy qarap, maquldady.
Qyrmyzy JUMAǴALIQYZY,
EUÝ stýdenti