Polısııa qyzmetkerleri, eriktiler, TJD qyzmetkerleri jáne basqa da aqtóbelik azamattar 4 maýsym kúni keshkilik ýaqytta úıinen belgisiz baǵytqa shyǵyp ketken 13 jastaǵy Jetirý Kárimdi izdestirip jatyr. Balany izdeýge 500-ge jýyq adam jumyldyryldy. Kınologter izshil ıtterimen bala joǵalǵan «Zarechnyı-1» turǵyn úı alabyn, Elek jáne Qarǵaly ózenderiniń jaǵalaýyn túgel tekserip shyqty. Izdestirý sharalaryna 40 birlik tehnıka, eki qaıyq, ushý apparattary da paıdalanyp jatyr. Alaıda osy kezge deıin kórdim-bildim degen adam tabylmady.
4 maýsymda keshkilik Jetirý Kárim qaqpany ashyp, kóshege shyǵyp ketken. Úıinde atasy men ájesi bolǵan. Jasóspirimniń anasy perzenthanada. Sol kúni qatty nóser quıyp turǵanda, onyń kóshege shyǵyp ketkenin úıdegi qart kisiler baıqamaı qalypty. Jasóspirim týabitti syrqat. Sol tóńirektegi úılerdiń shatyrlary, káriz qudyqtary, qazýly shuńqyrlar túgel tekserilgenimen, esh nátıje joq. Bala jańbyr jaýyp turǵanda, ózen jaǵalap ketýi nemese toǵaıdyń arasyna kirip ketýi de múmkin. Kúnniń kúrkireýinen qorqyp elsizge qaraı ketip, adasyp júre berýi, ne aǵashtyń túbinde tyǵylyp jatyr degen kúdik bar. Eriktiler jasóspirimniń fotosýretin alyp, jol boıyndaǵy tamaqtaný oryndary, janar-jaǵarmaı beketteri men dúkenderge kirip surastyrsa da, kún keshkirgende ketken balany kórdim-bildim degen adam joq. Qazirgi kezde kósheler men ǵımarattardaǵy barlyq beınebaqylaý kameralary tekserilip jatyr.
Aqtóbe oblysy