«Ońtústik» óńirlik qolbasshylyǵyna qarasty 35748 áskerı bólimi ınjenerlik-saperlik bólimshesiniń mamandary respýblıkalyq mańyzy bar qalada Badam ózeni arqyly ótetin ýaqytsha kópir salyp berdi, dep habarlaıdy Egemen.kz Qorǵanys mınıstrliginiń baspasóz qyzmetine silteme jasap.
Jańatalap shaǵyn aýdanyn qalamen baılanystyryp turǵan kópir jaramsyz bolyp, halyq tyǵyz qonystanǵan alaptyń alty myńnan astam turǵyny úshin Shymkentpen baılanys úzilip qalǵan bolatyn.
Ýaqytsha kópirdi ornatý úshin áskerı ınjenerler KrAZ-255B kóliginiń negizinde TMM-3 kópir tósegishin qoldandy.
Qazirgi ýaqytta kópir arqyly qozǵalys qalpyna keltirildi. Onyń uzyndyǵy 10,5 metr, 60 tonna júkti kóterýge jaramdy.
– Qalalyq TJD-dan Badam ózeni arqyly ýaqytsha ótkel jasap berý týraly suranys túskennen keıin 15 ınjenerden turatyn birikken jasaq jiberildi. Keshke qaraı olar jeńil kólikter men jaıaý júrginshilerdiń qozǵalysyna qolaıly metall kópirdi ornatýdy aıaqtady, – dedi 35748 áskerı bóliminiń ınjenerlik qyzmet bastyǵy maıor Erik Raıymov.
TMM-3 uzyndyǵy 40 metrge deıin jáne tereńdigi 3 metrge deıingi kedergilerden ótetin kópir ótkelderin ornatýǵa jaramdy. Olar salmaǵy 60 tonnaǵa deıingi dóńgelekti jáne shynjyr tabandy tehnıkany kótere alady.