Fransııanyń bas shahary – Parıjde «Rolan Garros» týrnıri aıaqtaldy. Júlde qory 53 478 000 eýrony quraǵan jarysta Qazaqstannyń bes tennısshisi baq synady. Solardyń arasynan Elena Rybakına eń úzdik nátıjege qol jetkizdi.
Elimizdiń birinshi jáne álemniń tórtinshi raketkasy degen ataǵy bar Rybakına bastapqy básekelerde belgııalyq Grete Mınnen (6:2, 6:3) men Elıse Mertens (6:4, 6:2), nıderland Arancha Rýs (6:3, 6:4) jáne ýkraınalyq Elına Svıtolınaǵa (6:4, 6:3) san soqtyrǵanymen, shırek fınalda WTA tiziminde 15-satyǵa jaıǵasqan ıtalııalyq Jasmın Paolınıden (2:6, 6:4, 4:6) oıda-joqta jeńilip qaldy. Negizi Elena bul oıynshydan ótýi kerek edi. О́ıtkeni qarsylasyna qaraǵanda onyń ataǵy zor, sheberlik deńgeıi de joǵary. Biraq sol kúni Rybakınanyń oıyny múldem júrmedi. Al ózge jerlesterimiz, ókinishke qaraı, bul týrnırde tym súreńsiz óner kórsetti. Atap aıtsaq, Iýlııa Pýtınseva, Aleksandr Býblık jáne Aleksandr Shevchenko ekinshi aınalymnan asa almasa, Mıhaıl Kýkýshkın túsaýkeser kezdesýinde jeńilistiń kermek dámin tatty.
Parıjdegi dúbirli dodada jerlesterimizdiń deni senim údesinen shyǵa almaǵanymen, materıaldyq turǵydan barlyǵy da oljaǵa keneldi. Máselen, jekelegen saıystyń shırek fınalyna deıin jetkeni úshin Elena Rybakınanyń esepshotyna 415 000 eýro tústi. Ekinshi kezeńde jeńilgen jerlesterimiz 110 000 eýrony enshiledi. Tipten alǵashqy aınalymnan asa almaǵan Mıhaıl Kýkýshkınniń ózi 73 000 eýrony qaltasyna basty.
Bıylǵy «Rolan Garrostyń» basty sensasııasy» dep Mırra Andreevany aıtýǵa bolady. Álemdik reıtıngte qalyń toptyń arasynda júrgen 17 jastaǵy reseılik jas daryn Fransııanyń astanasynda aıdy aspanǵa bir-aq shyǵaryp, jartylaı fınalǵa deıin jetti. Týrnır barysynda ol nebir saqa sportshylarǵa san soqtyrdy. Desek te bul mejede Andreevanyń Jasmın Paolınıge áli jetpedi. Al ıtalııalyq tennısshi fınalda álemniń birinshi raketkasy Iga Sventekten 1:6, 2:6 esebimen oısyraı utyldy. Sóıtip, 24 jastaǵy Polshanyń maqtanyshy «Rolan Garrosta» tórtinshi márte bas júldeni oljalady.
Erler arasyndaǵy tartysta úzdik shyqqan tórt tennısshi jartylaı fınalda jolyqty. Bul mejede ıspanııalyq Karlos Alkaras ıtalııalyq Iаnnık Sınnerdi bes settik saıysta ázer utty – 2:6, 6:3, 3:6, 6:4, 6:3. Germanııalyq Aleksandr Zverev norvegııalyq Kasper Rýýdty qapy qaldyrdy – 2:6, 6:2, 6:4, 6:2. Fınalda álemniń úshinshi raketkasy Alkaras pen ATR tiziminde odan bir saty tómen turǵan Zverev kúsh synasty. 4 saǵat 19 mınýtqa sozylǵan aıqasta Pıreneı túbeginen kelgen dúldúldiń aıdarynan jel esti – 3:6, 6:2, 7:5, 1:6, 6:2. 21 jastaǵy Karlos óziniń sporttyq mansabynda tuńǵysh ret Parıjdegi dodada dara shyqty. Oǵan deıin ol «Ýımbldon» men AQSh-tyń ashyq birinshiliginde bas júldeni oljalaǵan. Atalǵan jarystyń qorytyndysy boıynsha jekelegen saıysta jeńimpaz atanǵan oıynshylarǵa 2,4 mln eýro tabys etilse, fınalda utylǵandary sol somanyń teń jartysyn aldy. Jartylaı fınalda kúsh synasqan oıynshylar 650 myń eýrony ıelendi.
Jalpy, Parıjdegi týrnırde kútpegen nátıjeler kóp tirkeldi. Solardyń arasynan «Rolan Garrostyń» rekordshysy Rafael Nadal men «Úlken dýlyǵa» sanatyndaǵy jarystardyń úsh dúrkin jeńimpazy, ulybrıtanııalyq Endı Marreıdiń tusaýkeser kezdesýlerinde súrinýin, TOP-10-dyqtyń qataryna erkin enip otyrǵan qytaılyq Chjen Sınven men belarýstik Irına Sobolenkonyń 17 jastaǵy Mırra Andreevaǵa ese jibergenin aıryqsha atap ótýge bolady. Sondaı-aq álemniń birinshi raketkasy, serbııalyq Novak Djokovıch jaraqatyna baılanysty Kasper Rýýdqa qarsy ótýge tıis shırek fınaldyq oıynǵa shyqpady.