Bizde ǵana emes, álemde týrıster aǵyny kóbeıip, salaǵa suranys artty. Sáıkesinshe, bizdiń týrızmdegi kem-ketigimiz de kórine bastady. Prezıdent Qasym-Jomart Toqaev týrızmdi damytý jónindegi keńeste osy olqylyqtyń ornyn toltyratyn máselelerge jeke-jeke toqtaldy.
Iá, rasynda týrızm sózben ǵana aıtyp, jyly jaýyp qoıa salatyn sala emes. Memleket basshysy osyny meńzep otyr. Prezıdent eskergen máselelerdiń ishinde logıstıkany aıtalyq. Týrıstik oryndar sheteldik týrıster úshin ǵana emes, ózimizdiń el azamattaryna da jaıly bolýy kerek. Olardyń demalys aımaqtaryna yńǵaıly kólikpen alańsyz jetip, jaqsy oryndy saılaýyna mol múmkindik bolsa jaqsy. Taǵy bir másele, elde týrıstik nysandardyń sanyn kóbeıtý úshin ınvestorlarǵa qoldaý kórsetý jaǵy aqsamaýy tıis.
Keıingi jyldary óńir basshylary birneshe negizgi salaǵa ınvestor tartýǵa basymdyq bere bastaǵan edi. Endi osy qatarǵa týrızm salasy da qosylǵaly tur. Buǵan qosa týrızm ınfraqurlymyn damytý úshin jeke baǵdarlama, júıeli jospar qajet. Keńeste vıza, mıgrasııa máselelerin sheshýmen qatar, elimizdi halyqaralyq deńgeıde nasıhattaý jaǵy nazardan tys qalmady. Shyny kerek, bizge jaqyn Ázerbaıjan, Grýzııa, О́zbekstan memleketin alyp qarasaq, olar osy jumysqa bizden erte kirisip, qazir týrızmge qolaıly el retinde tanylyp úlgerdi. Bizge de kórshilerimizdiń belsendiligi oń áser etedi. Biraq biz bul ıgilikti kórý úshin olarmen osy salada tyǵyz baılanys ornatyp, elimizdi halyqaralyq deıgeıde tanytýǵa kúsh salýymyz qajet. Osy máseleler kóp keshikpeı rettelse, týrızmge serpin bereri anyq.
Danıel Serjanuly,
«Kazakh Tourism» UK» aksıonerlik qoǵamy basqarma tóraǵasynyń orynbasary