Jıyn ótken Saǵadat Nurmaǵambetov atyndaǵy Qurlyq áskerleri áskerı ınstıtýtynyń «Álı» oqý ortalyǵynda barlyq qajetti ınfraqurylym jasaldy. Onda shatyrly qalashyq jabdyqtalyp, jarys alańdary daıyndalyp, baǵdarlar salyndy, dep jazady Egemen.kz.
О́tken demalys kúnderi Almaty qalasyna Ázerbaıjan, Belarýs, Qazaqstan, Qyrǵyzstan, Reseı jáne О́zbekstan áskerı-patrıottyq klýbtarynyń 14-17 jas aralyǵyndaǵy 750 jas patrıoty bardy.
«Álı» oqý ortalyǵy aýmaǵynda ornalasqan dalalyq lager naqty kestege sáıkes ómir súrýde. Búgin tańǵy sapqa turýda Desanttyq-shabýyldaý áskerleri qolbasshysynyń orynbasary polkovnık Radjan Janysov týǵan kún ıelerin quttyqtady. Olardyń qatarynda Jambyl oblysy «Aıbar» áskerı-patrıottyq klýbynyń tárbıelenýshisi Nııaz Pashalıev, QR Memlekettik kúzet qyzmeti «Jas qalqan» áskerı-patrıottyq klýbynyń tárbıelenýshisi Arlan Asherbekov, QR UQK Shekara qyzmeti «Jas shekarashy» áskerı-patrıottyq klýbynyń tárbıelenýshisi Álnur Nuraly, «Batys» óńirlik qolbasshylyǵy «Batys» áskerı-patrıottyq klýbynyń tárbıelenýshisi Aıkórkem Amanqos jáne Pavlodar oblysy Qabanbaı batyr atyndaǵy «Jas sarbaz» mamandandyrylǵan lıseı-mektep-ınternatynyń tárbıelenýshisi Arystan Múbarak bar.
«Jarystar bastaldy. Baǵdarlamada AK-74 avtomatyn jartylaı bólshekteý jáne qurastyrýdan normatıvterdi oryndaý, «Aıbyn daryny» zııatkerlik oıyny, ulttyq sport túrleri boıynsha jarystar jáne Smart sarbaz baıqaýy bar», dep atap ótti «Jas sarbaz» respýblıkalyq áskerı-patrıottyq qozǵalysynyń tóraǵasy maıor Meıirbek Meńdiǵalıev.
Esterińizge sala keteıik, áskerı-patrıottyq jıyn Keńes Odaǵynyń Batyry, № 1 Halyq qaharmany, Táýelsiz Qazaqstannyń tuńǵysh Qorǵanys mınıstri armııa generaly Saǵadat Nurmaǵambetovtyń týǵanyna 100 jyl tolýyna oraılastyrylǵan.
Jıynnyń saltanatty ashylýy erteń kórnekti áskerı qolbasshynyń esimimen atalatyn Qurlyq áskerleriniń áskerı ınstıtýtynda ótedi.