Aýdandaǵy qarapaıym aýyl mektebi respýblıkadaǵy úzdik on mekteptiń qatarynan tabyldy. 1997 jyly mańǵystaýlyq ǵalym, fılologııa ǵylymynyń doktory Mekerııa Atymovtyń esimin ıelengen mektep 1992 jyly paıdalanýǵa berilgen. Osy jyldar ishinde jan-jaqty damý jolyn tańdap, elimizdiń bilimdi ul-qyzdaryn tárbıeleý jolynda tynymsyz izdenis ústinde keledi. Biz áńgime qylyp otyrǵan Mańǵystaý aýdanyndaǵy M.Atymov atyndaǵy №6 mekteptiń elimizdegi eń úzdik aýyl mektepteriniń tizimine enýi de osy izdenistiń, temirdeı tártip pen tegeýrindi talaptyń nátıjesi.
Qazirgi tańda atalǵan mektep qabyrǵasynda 1-11 synyptar boıynsha 604 oqýshyǵa 86 pedagog bilim beredi. 3 muǵalim magıstr, 77 muǵalim joǵary bilimdi, 6 muǵalim-arnaýly orta bilimdi desek, onyń ishinde 23 muǵalim pedagog-zertteýshi, 18 oqytýshy pedagog-sarapshy, pedagog-moderator sanatynda 19 muǵalim bar.
– Mektebimizdiń respýblıka boıynsha «Úzdik aýyl mektebi» qataryna qosylýy biz úshin úlken jetistik jáne óte qýanyshty jańalyq. Mektebimizdiń tarıhynda alǵashqy ret osyndaı jetistikke qol jetkizdik. Oqýshyǵa sapaly bilim men sanaly tárbıe berý isin jańa talap turǵysynan ońtaılandyryp, ári qaraı jumys isteı beremiz. Shákirt jetistigi – ustaz mereıi. Bul jetistik bizge shabyt syılady. Ári qaraı eńbek etýge jigerlendirdi. Mektebimizde áli de talaı daryndy oqýshylarymyz bar. Solarǵa zor úmit artamyz, – degen M.Atymov atyndaǵy №6 jalpy bilim beretin mektep dırektory Aıtbıbi Ulyqmanova mekteptiń aıtarlyqtaı jetistikke jetýine birden-bir sebepshi bolyp otyrǵan ustaz dep áriptesi Almajan Qurashova О́tesbaıqyzyna alǵysyn jetkizdi.
M.Atymov atyndaǵy orta mektep oqýshylarynyń saıystan júldesiz oralýy sırek. Birqataryna toqtalsaq, aýyl balalaryna arnalǵan «Aýyl olımpıadasynyń» oblystyq kezeńinde orys tili páni boıynsha 10-synyp oqýshysy Janbota Maqsat 3-oryn alyp, qola medal ıegeri atanǵan. Al qazaq tili páni boıynsha 10-synyp oqýshysy Dıdar Bıǵalı 3-oryn, qola medal ıegeri, fızıka páninen 9-synyp oqýshysy Nazıpa Joldas 4-oryn dıplomymen marapattalǵan. Sondaı-aq 2023-2024 oqý jyly boıynsha aýyl balalaryna arnalǵan «Aýyl olımpıadasynyń» respýblıkalyq kezeńi boıynsha qazaq tili páninen 1-oryndy «Altyn alqa» ıegeri Nursáýle Júsip ıelenip, Halel Dosmuhameduly atyndaǵy pedagogıkalyq ýnıversıtetiniń grantyn utyp aldy. Osylaısha, mekteptiń maqtanyshy bolǵan Nursáýle bıyl Ulttyq biryńǵaı testileýden 137 ball jınap, oblys maqtanyshyna aınaldy.
Tereń bilim berýdi basty maqsat etken M.Atymov atyndaǵy orta mektepten el bolashaǵyna bilimdi, bilikti jastar daıyndala beredi dep senemiz.
Mańǵystaý oblysy