1918 jyl. Kúz aıy. Qoqan qalasy. Basyna aq sálde, uzyn shapan kıgender – shahar turǵyndary. Ylǵı er adam. Olardan sál joǵaryraq tórdegiler (soldan ońǵa qaraı sanaǵanda): Hady Faızı, Shafık Shaıdýllın, Názir Tórequlov, Pýlat Salıev, Abdýlla Mustaqaev. Fotonyń tómengi jaǵyna «Qoqan qalasyndaǵy Halyq ýnıversıtetiniń ashylý saltanaty» dep kórsetilgen. Bul tarıhı fotosýretti Aqtóbe oblystyq memlekettik arhıviniń qyzmetkerleri Ýfa qalasyndaǵy Ulttyq arhıvten tapty.
Birtýar qaıratker, KSRO-daǵy tuńǵysh qazaq elshisi Názir Tórequlov (1892–1937) Qoqanda dúnıege kelgen. Osy qalada jádıt mektebin aıaqtaǵan. 1917 jylǵy Aqpan tóńkerisinen keıin Orynborǵa kelip, «Erkin dala» uıymynyń quryltaıyn ótkizip, 1918 jyly sáýirde «Qazaq muńy» gazetin shyǵarǵan. Osy jyly jazda Qoqanǵa oralyp, jumysshy, dıqan jáne soldat depýtattary keńesine qyzmetke turyp, «Halyq gazetin» jáne «Inqılob» jýrnalyn shyǵarýǵa atsalysty.
Oqý ornynyń ashylý rásimin ótkizgen toptyń arasynda otyrǵan qaıratker basyna keń jıekti qalpaq kıgen. Janynda – jańa saıasattaǵy serikteri. Jıyn qala ortasyndaǵy jámı meshit janynda ótken sııaqty. Adamdardyń artynda kirpishten órilgen meshit ne medrese ǵımaratynyń esigi men terezesi anyq kórinip tur.
Aqtóbe oblysy