Qaraǵandyda medısına salasyndaǵy kadr jetispeýshiligin joıyp, bilikti dárigerlerdi jan-jaqty qoldaý arqyly óńir medısınasyn órkendetýge basymdyq berilip keledi. Máselen, ótken jyly medısına qyzmetkerleriniń kúni qarsańynda aýylǵa baryp, qyzmet etetin aq halatty jandarǵa 1,5 mln teńgeden 5 mln teńgege deıin sertıfıkat tabystaldy. Al kúni keshe jas dárigerlerge baspana kilti saltanatty túrde berildi.
Oblystyq balalar klınıkalyq aýrýhanasynyń eski ǵımaraty kúrdeli jóndeýden ótip, «Dárigerler úıi» dep atalyp, jańa ǵımarat jas medısına mamandaryna baspana etip berildi. Turǵyn úı dárigerler arasynda 12 medısınalyq uıymǵa bólinip, dál osy úıden 94 jas maman qyzmettik páter kiltin aldy.
Jańa baspana ıelerine úılerdiń kiltin Densaýlyq saqtaý mınıstri Aqmaral Álnazarova men oblys ákimi Ermaǵanbet Bólekpaev tabystap, jańa qonystaryna qutty bolsyn aıtty.
– Kásibı mereke qarsańynda osyndaı tamasha saltanatqa jınaldyq. Men kilt tapsyrýǵa arnaıy keldim. Búgin biz densaýlyq saqtaý qyzmetkerlerine qandaı áleýmettik qoldaý kórsetetinin kórip otyrmyz. Kóp máseleniń sheshimin tabýy oblys ákimderine baılanysty. Sizdiń aımaqtaryńyzda dárigerlerge osyndaı qoldaý kórsetiletini qýantady. Jańa páterlerge baqyt ornasyn! – dedi óziniń quttyqtaýynda mınıstr Aqmaral Álnazarova.
Sýretti túsirgen – Jangeldi ÁBDIǴALYM
Sonymen qatar mınıstr aımaqta atqarylyp jatqan ıgi bastamalarǵa da toqtala ótip, oǵan da oń baǵa berdi. Ásirese aýyl medısınasyn damytý úshin salynyp jatqan 155 nysanǵa. Endi bir-eki jyl ýaqyt ishinde tolyq paıdalanýǵa berilip qalady.
О́ńirde medısına salasy qyzmetkerleriniń jaǵdaıyn jaqsartý ári kadr tapshylyǵyn sheshý maqsatynda júzege asyp jatqan baspanamen qamtý jumysy ári qaraı da jalǵasa beredi. Baspana máselesi sheshilse, kadr tapshylyǵy da joıylady. Sol sebepti, dárigerlerge jyl sońyna deıin taǵy baspana beriledi.
– Memleket basshysy Qasym-Jomart Toqaev medısına salasynyń qyzmetkerlerine jaǵdaı jasaý kerektigi jóninde basa aıtqan edi. Osy rette bıyl biz 220 páter beremiz. Dárigerlerdi turǵyn úımen qamtamasyz etý jumysy jalǵasady. Sizderge densaýlyq jáne jańa baspanada tek shattyq tileımiz! – dedi aımaq basshysy.
«Dárigerler úıindegi» páterlerdiń jartysy – birbólmeli, jartysy – ekibólmeli. Barlyq úı jóndeýden ótkizilgen. Jıhazben, qajetti turmystyq tehnıkamen qamtylǵan.
Qyzmettik páterge qol jetkizgenderdiń biri – Ýmıda Pazylova. Ol – qalanyń Prıshahtınsk bóligindegi №2 emhananyń jalpy praktıka dárigeri. Qaraǵandyǵa kelip, jumys istep jatqanyna eki jyl bolypty.
– Oblys ákimdigine alǵysymyz sheksiz. Joldasymmen, eki balammen eki bólmeli páter ıesi atandyq. Kadr jetispeýshiligine baılanysty Qaraǵandy oblysyna Túrkistan oblysynan shaqyrtýmen kelgenbiz. Jańa páterge kóship, endi alańsyz eńbek etemiz, – deıdi Ýmıda Pazylova.
№3 kópsalaly aýrýhananyń anestezıolog-reanımatologi Onlasyn Toqaev pen «Jysan Med» emhanasynyń onkologi Jazıra Naýqanova da jańa baspanaǵa ıe bolǵandaryna qýanyshty.
– Páterler jaıly ári jaryq. 2023 jyldyń qazanynda otbasyn quryp, páter jaldap turdyq. Úıli bolsaq degen armanymyz bar edi. Áıtpese, úı jaldap turý jas mamandar úshin qymbatqa túsedi. Endi, mine, qýanyshymyzda shek joq. Alańsyz jumys isteýge múmkindigimiz bar. Taǵy bir artyqshylyǵy – qala ortalyǵynda ornalasqandyǵy. Qalanyń kez kelgen jerine baryp-kelýge tıimdi. Armanymyzdy júzege asyrǵan memlekettik organdarǵa rahmet, – deıdi O.Toqaev.
Buǵan deıin Buqar jyraý aýdany Doskeı aýlyndaǵy jóndeýden ótken úıde 40 medısına qyzmetkeri qyzmettik turǵyn úıge qol jetkizgen edi. Munymen qosa, bıyl aýylǵa baratyn medısınalyq qyzmetkerler 8,5 mln teńgeden alady.
Qaraǵandy oblysy