Elimizde iri sıfrlyq ınfraqurylym qalyptastyrýǵa baǵyttalǵan «Derekterdi óńdeý ortalyqtary alqaby» jobasyn iske asyrý qarqyn aldy. Joba aıasynda ınvestorlar tartý, energetıkalyq baza qurý jáne arnaıy jeńildikter engizý jumystary júrgizilip jatyr, dep habarlaıdy Egemen.kz.
Jıynda Premer-mınıstrdiń orynbasary – Jasandy ıntellekt jáne sıfrlyq damý mınıstri Jaslan Mádıev, Energetıka mınıstri Erlan Aqkenjenov, Pavlodar oblysynyń ákimi Asaıyn Baıhanov, «Qazaqtelekom» AQ basqarma tóraǵasy Baǵdat Mýsın atqarylyp jatqan jumystar týraly baıandady.
Úkimettiń baspasóz qyzmetiniń málimdeýinshe, Pavlodar oblysynyń Ekibastuz qalasynda jobany iske asyrý aıasynda jer ýchaskeleri anyqtalyp, negizgi kelisimder jasaldy. Sonymen qatar qýaty 215 MVt bolatyn qosalqy stansa satyp alyndy, bul jobanyń energetıkalyq ınfraqurylymynyń negizin qalyptastyrady.
Keńes barysynda ınvestorlar úshin qolaıly orta qalyptastyrý maqsatynda energııamen jabdyqtaýdyń jeńildetilgen tarıftik modeli bekitilip, tıisti ınvestısııalyq jáne salyqtyq preferensııalar belgilendi.
Ekibastuz GRES-3 stansııasy salynady: Eldiń elektr energııa óndirisi ulǵaıady
Baǵdat Mýsınniń aıtýynsha, jobaǵa halyqaralyq tehnologııalyq jáne ınvestısııalyq kompanııalardy tartý boıynsha jumystar jalǵasyp jatyr. Atap aıtqanda, AQSh, Qytaı jáne Úndistan elderinen 20-dan astam hyperscale-kompanııamen kelissózder júrgizilgen. Bul kompanııalar «bultty» esepteý, úlken derekterdi óńdeý jáne jasandy ıntellekt salalarynda jumys isteıdi.
Kelissózder nátıjesinde 100 MVt-tan joǵary qýatqa aldyn ala suranys qalyptasty. Al jobanyń jalpy áleýeti 1 GVt-qa deıin jetip, iri «zákirlik» klıentterdi ornalastyrýǵa múmkindik beredi.
Jalpy alǵanda, «Derekterdi óńdeý ortalyqtary alqaby» jobasy Qazaqstanda iri óńirlik sıfrlyq hab qalyptastyrýǵa jáne álemdik jetekshi tehnologııalyq kompanııalardy tartýǵa baǵyttalǵan.
Premer-mınıstr qajetti normatıvtik sheshimderdi jedel qabyldaýdy jáne jobanyń barlyq kezeńderiniń belgilengen merzimde oryndalýyn qamtamasyz etýdi tapsyrdy.
Ekibastuz monoqala sanatynan shyǵaryldy