Alımentten jaltarǵandar

Ásirese 25-40 jastaǵy er adam­dar arasynda barlyq tabysyn býkmekerlik keńseler­ge salyp, otbasyn asyraýdan jaltaryp, balasyna alıment tóleýden qashyp júrgender kóbeıgen. Taldaý nátıjesi alı­mentten jaltarǵandar­dyń kóbi býkmekerlik keńseler­diń turaqty klıentteri eke­nin kórsetti. Máselen, Aqtó­be oblystyq polısııa depar­ta­mentiniń qaraýyndaǵy 189 izdestirý isiniń 138-i balalaryna materıaldyq kómek kór­setýden úzildi-kesildi bas tartyp, ata-analyq quqyqtaryn jaltarǵandarǵa qatysty tir­keldi. Munymen bir kezde óńir­de alıment boıynsha qaryz­dyń jalpy somasy 30 mıllıon teńgeden asyp barady. Polısııa alımentten jaltarǵandardyń derekterin tekserý barysynda osy tizimdegi 40-qa jýyq ata-ananyń býkmekerlik keńselerge jıi bas suǵyp, osy jerde únemi qomaqty qarjy joǵaltatynyn anyqtady.

«Bıyl qabyldanǵan sharalar nátıjesinde balasyna alıment tólemegeni úshin izdeý­de júrgen 128 azamattyń tur­ǵylyqty jeri anyqtalsa, olar­dyń 30-y býkmekerlik keń­selerdiń turaqty klıenti bolyp shyqty. Al olardyń balalaryna alıment qaryzy­nyń somasy býkmekerlik keń­selerde bás tigýde joǵaltqan aqshalarynan birneshe ese az. Máselen, K. de­gen azamattyń kámelet jasy­na jetpegen úsh balasyna qatysty alıment bereshegi 2 mıl­lıon teńgeden astam bol­sa, keıingi eki jylda osy aza­mattyń esepshotyndaǵy aqsha aınalymy 5 mıllıon teń­ge­den asyp ketken. Mundaı my­sal­dar óte kóp», dep kórse­tilgen Aqtóbe oblystyq polısııa departamenti baspasóz qyzmetiniń habarlamasynda.

Sondaı-aq izdestirilip jat­qan azamattyń jaqyn týystary polısııa qyzmetkerleri­ne onyń qandaı mekenjaıda tu­ryp jatqanyn jáne jumys ornyn barynsha jasyrýǵa tyrysyp baǵady eken. Alımentten qashyp júrgen ákeler de kóp jaǵdaıda quqyq qorǵaý organ­darynyń kózine túspeý úshin tómen jalaqyǵa zańsyz eńbek etip, kezdeısoq tabystarmen kúneltedi. Aıta ketý kerek, alıment tóleýden jaltaryp, zań ta­laptaryn oryndamaıtyndar úshin Qylmystyq kodekstiń 139-baby boıynsha qylmystyq jaýapkershilik kózdelgen.

Aqtóbe oblysy