Sý tasqynynyń saldary tosyn tabıǵı apattarǵa daıyn emes ekenimizdi uǵyndyrdy. Tasqyn sý ásirese memlekettik qyzmetshilerdi ábden ábigerge túsirdi. Endigi kezde óńir ákimderi malaızııalyq áriptesterinen tájirıbe jınaqtap, tosynnan kelgen tabıǵı qubylystarǵa tótep bermek.
Malaızııa – tabıǵı apat kezinde, odan keıin memlekettik qyzmetshilerdiń is-qımyl algorıtmderin jiti qurastyrǵan birden-bir el. О́ıtkeni bul memlekette jaýyn-shashyn men sý tasqyny jıi bolady. Qural-jabdyqtarymen qatar ákimshilik qyzmetkerleri ár kezde saqadaı saı turady. Osy salada jyldar boıy jınaǵan tájirıbelerin Malaızııa Qazaqstannyń memlekettik qyzmetkerlerimen bólisýge daıyn.
«Sý tasqynyn basqarý – óte mańyzdy is. Qazaqstan mundaı aýqymdy seldi kútpegenin túsinemiz, biraq álemde klımattyq ózgeristerge baılanysty nóser jaýynnan týyndaǵan sý tasqyny aldaǵy ýaqytta da qaıtalana bermek. Biz tabıǵı apat kezinde jáne odan keıin memlekettik qyzmetshilerdiń is-qımyl algorıtmderin jetildirý úshin Qazaqstanmen tájirıbe almasýǵa daıynbyz. Malaızııa Memlekettik basqarý akademııasy tarapynan memlekettik qyzmetshilerdiń biliktiligi men kommýnıkatıvtik daǵdylaryn arttyrý boıynsha oqytý kýrstaryn uıymdastyrýǵa ázirmiz. Daǵdarys kezinde jumys isteıtin mamandardyń biliktiligi joǵary bolýy jáne halyqtyń muń-muqtajyn túsine alýy kerek», dedi Prezıdent janyndaǵy Memlekettik basqarý akademııasynda ótken kezdesýde Malaızııa Parlamenti Senaty tóraǵasynyń mindetin atqarýshy Nýr Djazlan Mohamed.
Malaızııa – Qazaqstannyń Ońtústik-Shyǵys Azııadaǵy negizgi seriktesteriniń biri. Sondyqtan aldaǵy ýaqytta túrli daǵdarys kezinde ózderi tájirıbeden ótkizip, ázirlegen daǵdylarymen bólisýge nıetti. Al kezdesý barysynda Nýr Djazlan Mohamed memlekettik qyzmetshiler jumysynyń tıimdiligin arttyrý, memlekettik basqarýdy sıfrlandyrý jáne memlekettik sektor jumysynda jasandy ıntellektini paıdalanýdyń artyqshylyqtaryn aıtty. Akademııa rektory Erlan Ábil Malaızııa ókiliniń usynysyn qabyl alyp, áriptestik baılanys ornatýǵa shaqyrdy.