Bıylǵy sý tasqyny saldarynan eldiń 10 oblysynda tótenshe jaǵdaı jarııalandy. Bul - kólemi jaǵynan sońǵy 80 jyldaǵy eń iri tabıǵı apat. Osynaý qıyn-qystaý kezeńde halyqtyń bir judyryqtaı jumylǵany birshama qaıǵyly oqıǵanyń aldyn aldy. Bolary boldy, tasyǵan sý jerge sińdi, jan-jaqqa aǵyzyldy. Ýaqyt óte kele bári qalpyna keletini belgili. Alaıda halyqtyń kezekti «daǵdarysqa» ushyraýy áp-sátte esten kete qoımas. Baspanasyz, kıim-keshek pen azyqsyz, maly men múliksiz qalǵan azamattarǵa keregi - jylýlyq.
Bıylǵy sý tasqyny saldarynan Aqmola oblysynda barlyǵy 1 817 úı sý astynda qaldy, onyń 359-y apatty dep tanylsa, qalǵan úıler jóndeýge bolatyn baspanalar sanatyna jatqyzyldy. Qazirgi ýaqytta zardap shekkenderge keltirilgen zalal ótelip, jańa úıler salynyp, jan-jaqty kómek kórsetilip jatyr.
Dál sol ýaqytta kómek qolyn sozǵandar kóp boldy. Qandaı da bir másele bolmasyn, halqymyz birigip, muqtajdarǵa kómektesetini janǵa jylý uıalatady ǵoı. Barlyq óńir turǵyndary, otandyq uıymdar, iri kompanııalar, baýyrlas memelketter gýmanıtarlyq kómek jınap, 10 apatty oblysqa jóneltken. Kishkentaı búldirshinder de eresekterge tán sheshim qabyldap, tıyn-tebenderin shyǵarǵan. Adam balasynan bólek, tipti ıt-mysyqtar da bóget turǵyzýǵa atsalysqanyn kórdik.
Bul rette eriktilerdiń de eńbegin erekshe aıta ketken jón. «Volonterliktiń damý deńgeıi - qoǵam órkenıetiniń belgisi». Aqmola oblysyndaǵy eriktiler osylaı deıdi. Olar aýyr dertke shaldyqqandarǵa aqsha jınaýǵa, jalǵyzbasty zeınetkerlerge azyq-túlik alyp berýge, qoǵamda tártip ornatýǵa, baspanasyz qalǵandardy tamaqtandyrýǵa, joǵalǵan jerlesterin izdeýge, qańǵybas janýarlarǵa meıirim berýge jáne balalardyń tárbıesine úles qosýǵa kómektesedi. Búginde eriktilerge de qoldaý kórsetý sharalary jańa serip alyp keledi.
Sý tasqyny kezinde jerlesterine qol ushyn sozǵan jandardyń biri - Anargúl Erjanqyzy. Kókshetaýlyq eriktiniń ómir tarıhy kıno ssenarııine uqsas deýge bolady. Onyń joǵary bilimi bar, biraq qan ortalyǵynda sanıtar bolyp jumys isteıdi. 100 myń teńge kóleminde jalaqy alyp, kóshe kezip júrgen adamdarǵa tamaq daıyndap, taratady. Kezinde kórshi memleketten Qazaqstanǵa kóshken ol da biraz ýaqyt boıy baspanasyz júrgen, oǵan da kómek kórsetkender tabylǵan.
Anargúl Erjanqyzy «Dobroe serdse Lider.kz» uıymynyń ujymyna qosylyp, biraz sharýa atqardy.
«Sý tasqyny kezinde tamaq pisirip, zardap shekkenderge tarattyq. Bul iske bizdiń uıymnyń eriktisi Iýlııa hanym bastamashy boldy, daladaǵy qazan-oshaqqa tamaq pisirip jatqanyn kórip, biz de kirisip kettik. Sol kezde kún sýyq boldy, qar erip, kóshelerdi sý basty. Qıyn ári kúrdeli sátte birlik pen qamqorlyqtyń ne ekenin túsindik. Sý tasqyny Ramazan aıyna tuspa-tus bolǵan edi, oraza ustaǵandar kóp boldy. Eshkimge «joq» demedik, tańerteń de túnde de jumysymyzdy istedik. Qajetti azyq-túlikti Kókshetaý turǵyndary men basqa eriktiler jınady», deıdi keıipkerimiz.
Onyń aıtýynsha, qala ákimdigi oblys aýmaǵynda bógetterdi turǵyzý jumystaryn, ózen-kólderdiń shamadan tys tasyp ketpeýin, keltirilgen shyǵyndy esepteý jáne basqa da mańyzdy máselelerge nazar aýdardy. Al turǵyndardy tamaqtandyrý, azyq-túlik, kıim-keshek taratý isimen eriktiler kóbirek aınalysqan, shyǵyndardyń basym bóligin «Dobroe serdse Lider.kz» uıymynyń jetekshileri ózderine alǵan.
«Qarǵyn sýmen kúresken qutqarýshylardy da nazardan tys qaldyrmaýdy jón dep eseptedik. Olarǵa da dalada turyp tamaq pisirdik, sý basqan oryndarǵa apardyq. Bul isten qala turǵyndary da qalys qalmady. Kókshetaýlyqtarǵa alǵysym sheksiz», dep qosty Anargúl Mýshkanova.
Kókshetaýlyq erikti mundaı tabıǵı apattar endi qaıtalanbasa eken dep tileıdi. Halyq arasynda júrgen volonter qoǵam osy syndy kúrdeli kezeńderde qatty qamyǵyp qalatynyn jasyrmady.
«Tasqyn kezinde baspanasynan, mal-múlkinen aıyrylyp qalǵan turǵyndardy kórdim. Ondaı materıaldyq zattar, árıne, adam densaýlyǵyna qaraǵanda qunsyz. Dese de ómir boıy eńbek etip, jyldar boıy bala-shaǵa, otbasy úshin jıǵan-tergennen bir sátte aıyrylyp qalý, úısiz qalý - óte qıyn. Osynyń barlyǵy adamdy kúızeliske ushyratady, bolashaqqa degen senimin joıady. Al biz, sol jandarǵa úmit bergimiz keldi», dep túıindedi Anargúl Erjanqyzy.