Adam jany siri ǵoı. Eger ózińdi óziń aıamaı shyńdap, kún saıyn jalyqpaı jattyqsań, nebir rekordtardy dúnıege ákeleriń sózsiz.
Máselen, Harrıett Tompson esimdi AQSh turǵyny marafon qashyqtyǵyn sátti júgirip álemdik rekord jańartqan. Iá, ol máre syzyǵyn birinshi bolyp kesip ótpese de, onyń erligi talaılardyń tańdaıyn taqyldatty. Endi ol qandaı erlik deısiz ǵoı? Bul keıýananyń ereksheligi – 92 jasynda San-Dıego marafonyn 7 saǵat 24 mınýt 36 sekýndta júgirip ótken. Onyń janynda 56 jastaǵy uly Brennı de bolǵan. Aıta keteıik, buǵan deıin Tompson aýyz qýysynyń obyrymen úsh márte kúresip, aqyrynda jazylyp ketken.
Antırekord ornatqan qaqpashy
Álemdik dop dodasynda nebir sensasıalar – jankúıerler kútpegen oqıǵalar jıi bolady. Sonyń eń erekshesi 1995 jyly «Jermınal Ekeren» men «Anderleht» arasyndaǵy ulttyq chempıonat matchynda tirkeldi.
Osy oıynda belgııalyq fýtbolshy Stan Van den Býıs óz qaqpasyna baıqamaı 3 avtogol soqqan. Árıne, sportshy tap bulaı rekord ornatam dep oılamaǵany anyq. Osylaısha, Anderleht komandasy birde-bir gol soqpaı-aq, 3-2 esebimen jeńiske jetti.
Sekirýdiń sheberi
Rekordtyń da túr-túri bar-aý. Qytaılyq sportshy Sen Sıaolın sekirgishpen sekirýdiń saıypqyrany atanyp, Gınnes rekordtar kitabyna engen.
17 jastaǵy bala 30 sekýnd ishinde 228 ret sekirip, álemdik rekord ornatqan. Osylaısha, ol Shanhaıdaǵy halyqaralyq týrnırde kóz ilespes jyldamdyǵy jáne erek daryny arqyly barsha jurttyń tańdaıyn qaqtyrǵan. Qytaılyq sportshy 30 sekýnd ishinde eń kóp sekirý rekordyn 2015 jyly ózi jasaǵan. Ol kezde 108 ret sekirgen edi.