Keńes Odaǵynyń Batyry, № 1 Halyq qaharmany, Qazaqstannyń tuńǵysh Qorǵanys mınıstri armııa generaly Saǵadat Nurmaǵambetovtyń týǵanyna 100 jyl tolýyna oraı uıymdastyrylǵan is-shara áskerı-patrıottyq klýbtar, áskerı mektepter men ýchılısheler tárbıelenýshileri arasynda erekshe áser qaldyrdy, dep habarlaıdy Egemen.kz aqparat agenttigi.
Áskerı-patrıottyq jıynǵa Ázerbaıjan, Belarýs, Qazaqstan, Qyrǵyzstan, О́zbekstan jáne Reseı quramalarynan 750 adam qatysty.
Qazaqstan komandalary atynan óńirlerden, QR Qarýly kúshteriniń, basqa da áskerler men áskerı quralymdardyń áskerı-patrıottyq klýbtarynan, QR Qorǵanys mınıstrliginiń astanalyq áskerı kolledjinen, "Jas ulan" respýblıkalyq mektepterinen, "Arystan" mamandandyrylǵan lıseıinen jáne oblystyq áskerı mektep-ınternattardan jarysqa qatysty.
Jas patrıottar jarysynyń aıaqtalý rásiminde Qorǵanys mınıstriniń orynbasary general-maıor Shaıh-Hasan Jazyqbaev sóz sóıledi.
– Sender tııanaqty daıyndalǵan shara óz máresine jetti. Bul saıystar senderdiń aqyl-oılaryńdy, kúsh-qýat daıyndyqtaryńdy, komandada qalaı jumys isteıtinderińdi kórsetti. Jańa dostar, qyzyqty kezdesýler men tájirıbeler esterińde máńgi qalady dep oılaımyn. Senderge sáttilik tileımin jáne órkendeı berińder, – dedi mınıstrdiń orynbasary.
Marapattaý rásimine "Qarýly Kúshter ardagerleri" RQB tóraǵasynyń orynbasary otstavkadaǵy general-maıor Marat Naǵumanov qatysty. О́z sózinde ol jıynnyń halyqaralyq deńgeıi jastardyń Jeńis batyrlaryna degen qurmeti men urpaqtar sabaqtastyǵyn kórsetetinin atap ótti. Túrli el ókilderiniń jıynǵa qatysýy osyndaı saıystarǵa áskerge deıingi jastardyń daıyndyq sapasyn arttyrýǵa septigin tıgizedi.
Jıyn erejesi boıynsha bas júldeni "Kúshimiz birlikte" fınaldyq oıynynda jeńimpaz atanǵan alady. Oǵan óz sanattarynda úzdik dep tanylǵan komandalar qatysqanyn aıta ketý kerek. Bul tartysqa toly saıysta Qaraǵandy qalasyndaǵy Talǵat Bıgeldınov atyndaǵy "Jas ulan" respýblıkalyq mektebiniń quramasy jeńiske jetti. Osy komandanyń kapıtanyna "Aıbyn-2024" X halyqaralyq áskerı-patrıottyq jastar jıynynyń Bas júldesi tabystaldy.
Uıymdastyrýshylar sanattar boıynsha jarystyń barlyq túrin qorytyndylady. Qatysýshy memleketter komandalary arasynda birinshi oryndy Qazaqstannyń namysyn qorǵaǵan Saǵadat Nurmaǵambetov atyndaǵy Qorǵanys mınıstrligi áskerı kolledjiniń kadetteri oljalady. Ekinshi orynda – О́zbekstan quramasy, úshinshi orynda – Belorýssııadan kelgen Mınsk Sývorov áskerı ýchılıshesiniń komandasy.
О́ńirler sanatynda Aqmola oblysynyń "Aıbyn" áskerı-patrıottyq klýby, ekinshi orynda Túrkistan oblysynyń "Arys" komandasy, úshinshi orynda Abaı oblysynyń "Abaı qyrandary" komandasy jeńiske jetti.
Qarýly kúshterdiń, basqa da áskerler men áskerı quralymdardyń áskerı-patrıottyq klýbtary arasynda Desanttyq-shabýyldaý áskerleriniń "Jas desantshylar" komandasy, ekinshi orynda – "Ońtústik" óńirlik qolbasshylyǵynyń "Bolashaq", úshinshi orynda – Áýe qorǵanysy kúshteriniń "Bes qarý" komandasy úzdik dep tanyldy.
Respýblıkalyq mektepter men oblystyq áskerı ınternattar ishinde birinshi oryndy Qaraǵandy qalasynyń "Jas ulan" respýblıkalyq mektebi, ekinshi oryndy Abaı oblysy Semeı qalasynyń "Jas ulan" arnaıy erler mektep-ınternaty, úshinshi oryndy Almaty oblysynyń "Arystan" mamandandyrylǵan lıseıi ıelendi.
Jarys jeńimpazdary kýboktarmen, medaldarmen, dıplomdarmen jáne estelik syılyqtarmen marapattaldy.