Qońyr kúzde Astana qalasynda V Dúnıejúzilik kóshpeliler oıyndary ótedi. Prezıdent janyndaǵy Ortalyq kommýnıkasııalar qyzmetinde ótken brıfıngte dúnıeni dúbirge bóleıtin dodaǵa daıyndyqtyń jaı-kúıi pysyqtaldy.
Baspasóz konferensııasyna Týrızm jáne sport vıse-mınıstri Serik Jarasbaev, V DKO daıyndaý jáne ótkizý jónindegi dıreksııa basshysy Naıl Nurov jáne Ulttyq sport qaýymdastyǵynyń vıse-prezıdenti Tastanbek Esentaev qatysty.
Tastanbek Esentaev Dúnıejúzilik kóshpeliler oıyndarynyń qarsańynda ulttyq sport túrleri boıynsha mamandar daıarlaý baǵytynda jumystar júrgizilip jatqanyn atap ótti. Elimizde alǵash ret 2 keshendi ǵylymı top quryldy. Olar jylqy sharýashylyǵy baǵytynda jáne ulttyq sport túrleriniń sportshylaryn daıarlaý boıynsha keshendi jumystardy júzege asyrmaq. Ǵylymı toptyń quramynda jetekshi ǵalymdar, veterınarlar, bıologter, genetıkter, sporttyq psıhologııa jáne medısına mamandary bar.
Búgingi tańda Almaty oblysyndaǵy olımpıadalyq daıarlaý ortalyǵynyń bazasynda ǵalymdar V DKO-ǵa qatysatyn sportshylar men sporttyq jylqylardyń fýnksıonaldyq jáne psıhologııalyq jaǵdaıyna monıtorıng júrgizip jatyr.
Qaýymdastyq qyzmetiniń basym baǵyttarynyń biri – ulttyq sport salasynda bilikti kadrlar daıarlaý.
«Táýelsiz Qazaqstan tarıhynda alǵashqy ret «At sportynyń veterınarııasy» jáne «At sporty túrleriniń jattyqtyrýshysy» mamandyqtary boıynsha Qazaq ulttyq agrarlyq zertteý ýnıversıteti jáne Qazaq sport, týrızm akademııasymen birlesip bilim baǵdarlamalary ázirlenip, mamandar daıarlaý qolǵa alyndy. Eki bilim baǵdarlamasy da ınnovasııalyq memlekettik tizimge engizildi. Bıyl atalǵan oqý oryndary 2 mamandyq boıynsha talapkerlerdi qabyldaıdy», deıdi Tastanbek Esentaev.
Bıylǵy naýryzda Joǵary ulttyq sport mektebi quryldy. Munda ulttyq sport túrleri boıynsha mamandardyń biliktiligin arttyrý jáne qoldanbaly zertteýler júrgizý baǵytynda jumys júzege asady. Búginde jattyqtyrýshylar men tóreshilerdiń biliktiligin arttyrý baǵytynda 8 baǵdarlama ázirlenip, tóreshiler úshin «Teńge ilý», «Kókpar», «Kók-bórý» (qyrǵyz) sport túrleri boıynsha biliktilikti arttyrý kýrstary ótkizilip keledi.
Sonymen qatar táýelsiz Qazaqstan tarıhynda tuńǵysh ret Ulttyq sport qaýymdastyǵy men Dúnıejúzilik etnosport konfederasııasy birlese otyryp, osy kúzde Astana qalasynda ótetin V Dúnıejúzilik kóshpeliler oıyndarynda qazylyq etetin tóreshilerdiń halyqaralyq semınaryn ótkizýdi kózdep, ıgi shara kestesi men oqý baǵdarlamasy ázirlenip jatyr.
Belgili kásipker, mesenat, «Altyn Qyran Foundation» qoǵamdyq qory Qamqorshylyq keńesiniń tóraǵasy Islambek Saljanov basqaratyn Ulttyq sport qaýymdastyǵynyń quramyna báıge, kókpar, teńge ilý, aýdaryspaq, jamby atý, sadaq atý, qusbegilik, asyq atý, «JORYQ» at sporty jáne t.b. federasııalar kiredi.