Memleket basshysy Buqaralyq aqparat quraldary qyzmetkerlerin kásibı merekelerimen quttyqtady, dep habarlaıdy Egemen.kz Aqordanyń baspasóz qyzmetine silteme jasap.
«Eń aldymen, barshańyzdy Buqaralyq aqparat quraldarynyń qyzmetkerleri kúnimen shyn júrekten quttyqtaımyn! Jýrnalıst – mártebeli mamandyq. Ol – aqıqat sózdiń, ótkir oı men shynaıy pikirdiń jáne ádil istiń jaqtaýshysy. Sondyqtan biz medıa salasynyń mamandaryna árdaıym zor qurmetpen qaraımyz», dedi Prezıdent.
Memleket basshysy túptep kelgende, memleket te, jýrnalıst te ult úshin qyzmet etetinin, el taǵdyryn sheshýge atsalysatynyn atap ótti. Búginde ult baspasózi men ult múddesi qaı kezde de ózektes bolǵanyn, qazir de solaı ekenin tilge tıek etti.
«Bizdiń maqsat-muratymyz – ortaq. Bul – barshaǵa teń múmkindikter beretin Ádiletti Qazaqstandy qurý. Men búgin medıa salasy mamandarynyń osy joldaǵy qajyrly eńbekteri úshin shynaıy rızashylyǵymdy bildiremin. Álıhan Bókeıhan «Gazet-jýrnal shyǵarýǵa zor sheberlik kerek» dep talap qoıǵan. Bul – búkil aqparat salasyna ortaq tujyrym. Jalpy, jýrnalıster memlekettik saıasatty halyqqa túsindirý isinde aıryqsha ról atqarady», dedi Qasym-Jomart Toqaev.