Ishki ister mınıstriniń birinshi orynbasary Marat Qojaev júrgizýshi kýáligin alý úshin onlaın emtıhan tapsyrý máselesi Sıfrlyq damý, ınnovasııalar jáne aeroǵarysh ónerkásibi mınıstrliginde talqylanyp jatqanyn aıtty, dep habarlaıdy Egemen.kz.
«Qazir azamattardyń ártúrli aımaqtardan avtoservıs ortalyqtaryna barmaýy úshin teorııalyq jáne praktıkalyq emtıhandardy qalaı uıymdastyrý kerektigi týraly suraqtar qarastyrylyp jatyr. Sıfrlandyrý mınıstri muny qalaı jeńildetýge bolatynyn oılastyryp jatqanyn aıtty», dedi M.Qojaev Senat otyrysynda.
Onyń aıtýynsha, eger júıe ashyq jáne baqylanatyn bolsa, eshqandaı másele bolmaýy tıis.
«Biz bes jyldan beri praktıkalyq ta, teorııalyq ta emtıhan qabyldamaımyz. Eger «sıfrlandyrý» júrgizýshi kýáligin alý úshin yńǵaıly, baqylanatyn nárseni engizse, eger bul qaýipsiz, ashyq bolsa, adamdar jol qaýipsizdigi týraly bilimderin kórsete alsa biz qarsylyq bildirmeımiz», dedi mınıstrdiń orynbasary.
Eske sala keteıik, Qazaqstanda júrgizýshi kýáligine emtıhan tapsyrý erejeleri ózgerýi múmkin. Bul týraly keshe Májiliste Ishki ister mınıstrligi men sıfrlyq departament ókilderi málimdedi.