Isek

Oblystyq radıonyń qyzmetkeri Jandos únemi mal sharýashylyǵy týraly jazady. Oblystyq televıdenıede isteıtin kezim. Jolsaparǵa birge shyǵamyz. Birde sol kezdegi Lenıngrad aýdanynyń qoı sharýashylyǵyna bardyq. Keńshar dırektoryna jolyǵyp, eńbegin elge tanystyrýǵa laıyqty ozat shopandy anyqtadyq. Endi ekeýimiz jazyp almaqpyz. Aqsaqal úıinde eken. Ekeýimiz de mıkrofonymyzdy daıyndap, eki jaǵynan suraqty jaýdyryp jatyrmyz.

– Maldyń kúıi jaman emes, – degen ozat shopan, – qysqa jaqsy tústi. Negizi maldyń qysty kóterýi kúzgi kúıine kóp baılanysty. Qora jyly, jemshóp aldynda.

– Bıyl júz qoıdan neshe qozy aldyńyz? – dep surady áriptesim.

– Árqaısynan úsh keliden jún qyryqtym. Men isek baǵamyn ǵoı, – dedi aqsaqal.

Áńgime qozdap jatyr. Aýyl-aımaqtyń, bota-taılaqtyń jaı-kúıi degendeı. Álden ýa­qytta áriptesim manaǵy saýalyn taǵy qaıtalady.

– Aqsaqal, ár qoıdan úsh keliden jún qyryqqanyńyz jaqsy eken, al júzinen qansha qozy alasyz? – dedi taqaqtap áriptesim.

Saýalyna kúlkim kelip barady. Biraq tótennen qosylý yńǵaısyz. Jazyp jatyrmyz ǵoı.

Aqsaqaldyń onsyz da kúreńitken júzi qaraýytyp ketkendeı. Tisiniń astynan syzdyqtatyp:

– Qalqam-aı, men isek baǵamyn ǵoı, – dedi.

Odan arǵy áńgime keńshardyń malshylarǵa jasap jatqan qamqorlyǵy, jumys kıimi, jalaqysy, malshylar úıindegi jaǵdaı týraly órbidi. Álden ýaqytta alǵashqy eki jaýap qulaǵyna kirmegen áriptesim, jabysyp alǵan jalǵyz saýalyn taǵy qoımasy bar ma?

– Qansha qozy alasyz?

Bul joly áýeli kúreńitken, keıin qa­raýytqan júzi múlde álem-tapyraq bolyp ketti. Keıinginiń, onyń ishinde jol biledi deıtin jýrnalıstiń sekti bilmegeni sezimine áser etken shyǵar. Tóteden qııalap bir-aq tartty. Túgel jazýǵa bolmaıdy, árıne. Negizgi nobaı bylaı.

– Atańa nálet, – dedi aqsaqal tútigip. – Isek erkek mal emes pe, odan qalaı qozy alasyń?

О́zine de sol kerek dedim men, biraq ishteı aıttym.

Kókshetaý