Jýyrda ǵana «Mazmundama» baspasynan «Dına Nurpeıisova kim?» «Oralhan Bókeı kim?» «Mánshúk Mámetova kim?» «Jaqsylyq Úshkempirov kim?» degen kitaptar jaryq kórdi. Atalǵan baspa «Ol kim?» serııasymen buǵan deıin de qanshama qazaqtyń nar tulǵalaryn tanystyryp júrgeni kópshilikke belgili. Tanymdyq sıpattaǵy eńbek óskeleń urpaqqa ultymyzdyń taýdaı tulǵalarynyń ómirinen syr shertedi. Oqyrman arasynda keń taralyp jatqany da málim.
Jalpy, bul serııamen shyqqan kitap bir tulǵa týraly tolyq aqparat beredi. Iаǵnı onyń týǵannan bastap qaıtys bolǵanǵa deıingi ómiri qamtylady. Dálirek aıtqanda, tulǵanyń balalyq shaǵy (bala kezindegi ereksheligi, qabileti, basynan ótken qyzyqty oqıǵalar), ǵylym, bilim, óner jolyndaǵy alǵashqy qadamy, ómiriniń ózgerýine yqpal etken oqıǵa (alǵashqy jetistigi, júldesi, erligi, t.b.), jeke ómiri (otbasy, dostary, ómir týraly kózqarasy, minezi, biregeı ádetteri, aınalasyndaǵylarmen qarym-qatynasy, t.b.), ósý jolyna yqpal etken, kedergi bolǵan adamdar men oqıǵalar, basyna túsken qıyndyqtar, kúres joly, el tarıhyna qosqan úlesi, (tulǵany ańyz adamǵa aınaldyrǵan jetistigi, ashqan jańalyǵy), arman-maqsaty, ókinishteri, qoǵamdaǵy róli (óz salasynan tys) jáne ómiriniń sońǵy jyldary (qaıtys bolǵan adamnyń ómiriniń sońy nemese kózi tiri tulǵanyń qazirgi ómiri, qaıda turatyny, nemen aınalysatyny, t.b.) baıandalady. Avtor tulǵa týraly kitapty 8-10 taraýǵa bólip, kezeń-kezeńimen tarqatyp jazyp shyǵady.
Tanymdyq kitaptyń taǵy bir ereksheligi – ár taraýda sol kezeńde bolǵan tarıhı oqıǵany, qubylysty ashatyn qyzyqty málimetter kezdesedi. Úlken shrıftpen berilgen málimetti oqyrman kóz toqtatyp oqı alady.
Eresek ómirde aqparat aǵyny kóp. Onyń biri esińde bolsa, biri umytylyp qalady. Al bala kezde oqyǵan kitaptyń kóbi esten ketpeıdi, tipti ómir boıy jadyńda saqtalýy múmkin. Bul kitaptardy da bala kishkentaıynan oqyp ósse, tulǵa týraly túsinigi qalyptasady. Balanyń tanymyna laıyq, jeńil tilmen jazylǵan kitapta bir tulǵa týraly júıeli aqparat bar. Sondaı-aq kitap sońynda jyldar boıynsha hronologııa berilgen. Onda sol kezeńde álemde jáne Qazaqstanda qandaı oqıǵalar bolǵany qamtylǵan.
«Ol kim?» serııasymen osy kúnge deıin 12 kitap jaryq kórgen. Qazir «Joshy han kim?» kitaby baspada jatyr. Tamyz aıynda «Qabanbaı batyr kim?» shyqpaq. Aldaǵy ýaqytta bul tizim jalǵasady. Baspa ujymy qazaqtyń handary men batyrlary, Alash zııalylaryn túgendemek jospary bar. Al avtorlarǵa bir kitapty jazýǵa 1-1,5 aı ýaqyt beriledi. Kitapta sketch stılinde 50-70 sýret bolady. Ony sýretshige arnaıy saldyrady. Ol da balanyń kitapty qyzyǵa oqýyna áser etedi.
Aıta keteıik, serııanyń jas ereksheligi 6+ bolǵanymen, muny bastaýysh mekteptiń oqýshylarynan bastap, eresek oqyrmanǵa deıin oqı alady. Kitap sońynda talqylaý suraqtary men arnaıy test berilgen. Oqyp bolǵan soń talqylaý suraqtaryn qoıyp, balanyń neni túsingenin tekserýge bolady. Sonymen birge bul saýaldarǵa jaýap berý arqyly jas oqyrman óz oıyn erkin jetkizip, túrli taqyrypta sóılep úırenedi, tanymy artady.
Iá, atalǵan serııamen shyǵyp jatqan kitaptardyń sanaly hám ultjandy urpaq tárbıeleýge tıgizer yqpaly zor. Ásirese, búgingideı smartfon zamanynda ósip jatqan balalarǵa óz halqynyń aıtýly tulǵalaryn tanytýǵa taptyrmas eńbek.