Senat depýtattary Sultan Dúısembınov pen Ǵalıasqar Sarybaev Jetisý oblysynyń Qaratal aýdanynyń turǵyndarymen kezdesý ótkizip, áleýmettik mańyzy bar birneshe nysanda boldy.
Senatorlar Bastóbe aýylyndaǵy shıki munaıdy qaıta óńdeý men mazýtty tereń óńdeýge mamandanǵan jaýapkershiligi shekteýli seriktestik «Sekvoııa plıýs» jabdyqtaryn jańǵyrtý barysymen, ortalyq aýdandyq aýrýhanadaǵy kúrdeli jóndeý jumystarynyń aıaqtalýymen, sondaı-aq Úshtóbe qalasyndaǵy gýmanıtarlyq kolledjdiń jumysymen tanysty.
«Munaı óńdeý zaýyty aýdan ekonomıkasyna da, jalpy Jetisý oblysy úshin de strategııalyq mańyzǵa ıe. Jabdyqty jańǵyrtý qaıta óńdeý úderisin jaqsartýǵa, atmosferaǵa zııandy shyǵaryndyny azaıtýǵa, aýyl turǵyndaryna jańa jumys oryndaryn ashýǵa múmkindik beredi», dedi senator S.Dúısembınov.
Depýtattar aýdandyq aýrýhanadaǵy kúrdeli jóndeýdi jedeldetýdiń mańyzyna, sondaı-aq gýmanıtarlyq kolledjde pedagog kadrlardy daıarlaý sapasyna jergilikti atqarýshy organdardyń nazaryn aýdardy.
«Aýdandyq aýrýhana halyqqa medısınalyq qyzmet kórsetedi. Medısınalyq kómek kórsetý sapasyn jaqsartý úshin jóndeýdi tez arada aıaqtaý jónindegi barlyq sharany júzege asyrý kerek, al kolledj pedagog kadrlardy joǵary deńgeıde daıarlaýǵa tıis. Balalarymyzdyń taǵdyry men elimizdiń bolashaǵy osyǵan baılanysty», dep atap ótti Ǵalıasqar Sarybaev.