Tarıhta tuńǵysh ret qazaq áıeli Zamıra Songobaı Mońǵolııa parlamentiniń depýtaty bolyp saılandy, dep jazady Egemen.kz.
«2016 jyldan beri bıliktegi Mońǵol halyq partııasy 28 maýsymda ótken eldiń Memlekettik Uly Hýraly (parlament) saılaýynda taǵy da kópshilik daýysqa ıe boldy», — dep jazady TASS.
Parlament saılaýynyń aldyn ala qorytyndysy segiz jyl bılik etken Halyq partııasy 500 123 daýys jınaǵanyn kórsetti.
Osylaısha ulty qazaq Zamıra Songobaı 2023 jyldyń jazynda qabyldanǵan jańa saılaý zańy boıynsha parlamentke ótken 32 áıeldiń qataryna kirip otyr.
Jańa saılaý zańnamasynda depýtattyq korpýstyń úshten bir bóligi áıelder bolýy kerek dep belgilengen. 2028 jyly ótetin kelesi parlamenttik saılaýdan keıin olardyń úlesi 40 paıyzǵa deıin ósýge tıis.
Depýtat jaıly aıtar bolsaq, Zamıra Songobaı – kópbalaly ana. Sondaı-aq Mońǵolııa isker áıelder qaýymdastyǵynyń basqarma múshesi.