«Taza Qazaqstan» jalpyulttyq aksııasy aıasynda oblystyq polısııa departamenti «Ekopatrýl» is-sharasyn uıymdastyryp, zańsyz qoqys tógýshilerdi ákimshilik jaýapkershilikke tartýdy qolǵa aldy. Polısııa qyzmetkerleri tabıǵatty búldirýshilerge qoldanylatyn ákimshilik sharalar jóninde kóshelerde jadynama taratty.
№1 qalalyq polısııa bólimi jergilikti polısııa qyzmeti bastyǵynyń orynbasary Qazbek Adaıbekovtiń aıtýynsha, polısııa jasaǵynyń reıdtik sharalar júrgizýine qaramastan, Aqtóbe sý qoımasy, Elek jáne Qarǵaly ózenderiniń jaǵasyndaǵy ruqsat etilmegen oryndarda qoqys úıip ketýshiler qatary azaıar emes. Qazirgi kezde ózender boıyna qoqys tastamaý týraly eskertýlerdi elemesten qorshaǵan ortany búldirýshilerdiń qarasy óte kóp.
Munymen qosa «Jasyl el» otrıady, oblystyq jastar resýrstyq ortalyǵynyń 150 múshesi Aqtóbe sý qoımasy jaǵasyn tazalaýǵa kelip, «Jasyl cross 2024» ploggıng-júgirý marafonyn ótkizdi. Ploggıng – qashyqtyqqa júgirýdi qoqys jınaýmen almastyratyn jańa ekologııalyq qozǵalys. Marafonǵa qatysýshylar bes topqa bólinip, bir-birimen jarysa júgirip, qoldaryndaǵy qapshyqtaryn qoqysqa toltyrdy. Kóńildi mýzyka yrǵaǵymen bılep júrip qoqys jınaǵan jastarǵa demalýshylar da qosyldy. «Jasyl el» stýdenttik qurylys otrıady oblystyq shtabynyń jetekshisi Nurjan Shańǵytbaevtyń aıtýynsha, jastar az ýaqytta sý qoımasy tóńireginen 18 tonna qaldyq jınap, demalýshylar tastaǵan qaǵaz, plastık jáne shyny qutylardy, plastık paketterdi suryptap bólip, kólikke tıep, qoqys polıgonyna jiberdi.
«Taza Qazaqstan» aksııasy bastalǵaly qala kósheleri men ózen jaǵalaýlary, toǵaı arasy biraz tazalandy. Úsh aıdan beri «Taza Qazaqstan» aksııasyna Aqtóbe oblysynan 213 myń 954 turǵyn qatysqan. Olar 18 myń 982 aýla, 276 saıabaq pen gúlbaqty tazalap, 285 myń 910 túp kóshet otyrǵyzdy.
Aqtóbe oblysy