Májilis depýtattary, «AMANAT» partııasy fraksııasynyń músheleri Aına Mysyrálimova, Iýlııa Kýchınskaıa, Natalıa Dementeva Kókshetaýda 1500 orynǵa arnalǵan mektep qurylysymen tanysty, dep jazady Egemen.kz.
Saryarqa shaǵyn aýdanyndaǵy jańa mektep «AMANAT» partııasynyń saılaýaldy baǵdarlamasyn júzege asyrý aıasynda salynyp jatyr.
«Bizdiń aýdanda kópbalaly otbasylar sany basym, al 17-shi mektepte oqýshylar synyptarda qysylyp otyrýǵa májbúr. Meniń eki balam bar, biraq úlkenim birinshi synypqa tek kelesi jyly barady. Sondyqtan biz jańa mektepti asyǵa kútemiz», deıdi jergilikti turǵyn Samal Saparbaeva.
Aına Mysyrálimova elimizdegi demografııalyq ósim qarqyny bilim berý júıesine kúsh salatynyn eskerip, bul rette mektepterdegi oryn tapshylyǵy eń ózekti máselelerdiń biri ekenin aıtty.
«Kókshetaý qalasyndaǵy halyq sany mıgrasııa esebinen de, týý kórsetkishiniń artýynan da ósip jatqany qýantady. Bıliktiń mindeti – qolaıly ómir súrý jaǵdaıyn jasaý, bul ásirese balalarǵa qatysty. Sondyqtan bizdiń saılaýaldy baǵdarlamamyz mektepter men balabaqshalar salýdy kózdeıdi. Merdiger osy mektepti jyl sońyna deıin paıdalanýǵa beretinin aıtty», dedi Aına Mysyrálimova.
Depýtat Iýlııa Kýchınskaıa búginde memleket bilim berý salasyndaǵy kadr tapshylyǵyn azaıtý jáne jastardy pedagog mamandyǵyna tartý boıynsha qabyldanyp jatqan sharalarǵa nazar aýdardy.
«Memleket basshysynyń bastamasymen 2019 jyly «Pedagog mártebesi týraly» arnaıy zań qabyldandy. Sońǵy birneshe jylda muǵalimderdiń jalaqysy eki ese ósti. Balabaqsha tárbıeshileriniń jalaqysy 30%-ǵa artty. Prezıdent depýtattar ázirlegen ǵylym jáne bilim máseleleri jónindegi zańǵa qol qoıdy. Basqa máselelermen qatar, zańda belgili bir dárejeleri men ǵylymı ataqtary bar pedagogterge aı saıynǵy ústemeaqy tóleý qarastyrylǵan. Bul muǵalimderdi yntalandyratyn sheshimderdiń biri», dedi Iýlııa Kýchınskaıa.
Aıta keteıik, byltyr Aqmola oblysynda «AMANAT» partııasynyń saılaýaldy baǵdarlamasy boıynsha 1245 orynǵa arnalǵan 16 balabaqsha, 3512 orynǵa eseptelgen 5 mektep ashyldy. Jalpy alǵanda, 2027 jylǵa deıin óńirde 39 mektep salý, sondaı-aq 82 mektepke kúrdeli jóndeý jumystaryn júrgizý josparlanyp otyr.