Búginde álemdegi geosaıası jaǵdaı turaqsyz bolyp tur. Túrli qaqtyǵys pen ultaralyq daý-janjal órshigen tusta halyqaralyq qaýymdastyqtyń judyryqtaı jumylyp, qoıan-qoltyq jumys isteýi óte mańyzdy. Ásirese turaqtylyq pen qaýipsizdikti saqtap, saýda-ekonomıkalyq baılanysty arttyrý ózekti.
Sol sebepti «Shanhaı+» sammıtine qatysý, dıalog alańynda kóteriletin usynystardy tyńdap, oryndaý asa mańyzdy. Bizdiń eldiń basshysy da sammıtke baqylaýshy memleket retinde qatysyp jatyr. Bir aı buryn Prezıdentimiz Rejep Taııp Erdoǵan ShYU-men yntymaqtastyqty arttyrýǵa nıet bildirgen edi. Sebebi bul elimizdiń múddesi úshin mańyzdy. Sarapshylardyń paıymynsha, jıynda strategııalyq máselelerge nazar aýdaryldy.
Jalpy, Uıym otyrysy álemdik deńgeıdegi máselelerdiń sońǵy, oń sheshimin shyǵarýǵa septigin tıgize alady dep bilemin. Mádenı-gýmanıtarlyq saladaǵy yntymaqtastyq, birlesken jobalar da kóńil qýantady. Osy oraıda Qazaqstan Ortalyq Azııanyń halyqaralyq saıasatynda óte salmaqty ról oınaıdy. Álemde dúrbeleń kóbeıip, keleńsiz oqıǵalar ýshyǵyp turǵanda Qazaqstan tatýlyq pen beıbitshilikke talmaı úndep keledi. Prezıdent Q.Toqaevtyń mańyzdy usynystary da ishki yntymaq, syrtqy yqpaldastyq máselelerine arnalǵan.
Qalaı degende de, qandaı da eldiń kórkeıip, ajarlana túsýinde, qalypty damýynda turaqtylyqtyń mańyzy zor. Sebebi memleket mereıi men ekonomıkanyń qaryshtap damýy basqa eldermen tıimdi qarym-qatynasty arttyryp, tyǵyz yntymaqtastyq ornatýǵa da baılanysty. Álemde eshbir el jeke-dara jahandyq máselelerdi sheshýge qaýqarsyz.
Aıshe SÝBERKER,«TRT World» tilshisi (Túrkııa)